Búgin Konstıtýsııalyq Sot alǵash ret Braıl shrıftimen memlekettik jáne orys tilderinde basylyp shyqqan Qazaqstan Respýblıkasynyń Konstıtýsııasynyń tusaýkeserin ótkizdi, dep habarlaıdy Egemen.kz Konstıtýsııalyq Sottyń baspasóz qyzmetine silteme jasap.
Konstıtýsııalyq Sottyń Qazaqstannyń Ata zańynyń mátinin kórý qabileti nashar nemese zaǵıp azamattar úshin Braıl shrıftine (bederli-núkteli taktıldi shrıft) aýdarý jobasyn EQYU-nyń Astanadaǵy baǵdarlamalar keńsesi jáne Mádenıet jáne aqparat mınıstrliginiń qoldaýymen jaryq kórdi.
Tusaýkeserge Qazaqstanda akkredıttelgen shet memleketter men halyqaralyq uıymdardyń elshileri, Parlament depýtattary men memlekettik organdardyń, Qazaqstannyń úkimettik emes uıymdary men ǵylymı qoǵamdastyq ókilderi qatysty.
Konstıtýsııalyq Sottyń Tóraǵasy Elvıra Azımova: «Ádiletti Qazaqstan» saıasaty memlekettiń adam quqyqtary men bostandyǵyn qamtamasyz etýge jáne kemsitpeýge beıildiligin rastaıdy. Konstıtýsııalyq Sot Konstıtýsııaǵa jáne Adam quqyqtarynyń jalpyǵa birdeı deklarasııasyna sáıkes árbir adam úshin teńdik, qadir-qasıet jáne ádildik qaǵıdatyn ilgeriletýdi jalǵastyryp jatyr. Konstıtýsııa mátinin Braıl shrıftimen basyp shyǵarý – bul bizdiń osy saıasatty ilgeriletýge qosqan úlesimiz», dep atap ótti.
О́z kezeginde, EQYU-nyń Astanadaǵy baǵdarlamalar keńsesiniń basshysy Folker Frobart Qazaqstan Konstıtýsııasynyń mátinin Braıl shrıftimen basyp shyǵarý konstıtýsııalyq baqylaý organynyń quqyq qorǵaý qundylyqtaryna jáne aqparatqa teń qoljetimdilikti qamtamasyz etýge ınklıýzıvti kózqarasqa beıildiligin kórsetetinin atap ótti.
Qazaqstan BUU-nyń Múgedekterdiń quqyqtary týraly konvensııasynyń qatysýshysy bolyp tabylady, ol qatysýshy memleketterdi múgedektigi bar adamdarǵa aqparatqa, bilimge qol jetkizýdi, zań aldyndaǵy teńdikti jáne teń quqyqtyq qorǵaýdy, sondaı-aq sot tóreligine qol jetkizýdi qamtamasyz etý arqyly adam ómiriniń barlyq aspektilerine jan-jaqty qatysýy maqsatynda tıisti sharalar qabyldaýǵa shaqyrady.
Braıl qarpimen shyǵarylǵan Konstıtýsııa mátininiń basylymdary 56 mekemege, sonyń ishinde respýblıkalyq, aımaqtyq kitaphanalarǵa, oqý ortalyqtaryna, mamandandyrylǵan mektepterge beriledi.
Dúnıejúzilik densaýlyq saqtaý uıymynyń derekterine sáıkes Qazaqstanda kórý qabileti buzylysqa ushyraǵan 160 myń adam turady. Eńbek jáne halyqty áleýmettik qorǵaý mınıstrliginiń derekteri boıynsha Qazaqstanda 85 myń zaǵıp adam, 4000 – nan astam kózi nashar kóretin balalar, olardyń 350-ge jýyǵy zaǵıp balalar.