Shý alqabynda ósiriletin jabaıy qarasora alqabynyń jańa kartasy jasaldy. Bul jóninde oblystyq polısııa departamentiniń baspasóz qyzmeti habarlady. Jalpy, óńir polıseıleri búgingi kúnge deıin 35 jyl buryn ázirlengen kartaǵa sáıkes derekterdi paıdalanyp kelipti. Endi, mine, 1989 jylǵy derekten qutylatyn kez keldi.
Ilgeridegi derekte oblys jabaıy qarasoranyń «tarıhı otany» sekildi kórinetin. О́ıtkeni mundaǵy sıfrǵa qarap, óńirde esirtkige qarsy kúreste qandaı jumystar atqarylyp jatqanyn bajaılaý qıynǵa soǵatyn. Naqtyraq aıtar bolsaq, munda qaýlap ósken qarasora alqaby 138 myń gektardan asyp ketken degen derek jıi aıtylatyn. Jaqynda qaıta naqtylanǵan zerdeleý jumystary basqa sıfrdy kórsetti.
Polısııa departamentiniń basshysy Armanbek Baımýrzınniń tapsyrmasyna sáıkes Shýdaǵy jabaıy qarasora qansha jerdi jaýlap alǵanyn anyqtaý jumystary tyńǵylyqty júrgizildi.
Zertteý jumystarynyń nátıjesine súıensek, qarasora ósetin alqap eki esege qysqarǵan. Bul derekti «Qazaqstan Ǵarysh Sapary» AQ qyzmetkerleri aerografııalyq túsirilim kezinde resmı rastady. Naqtyraq aıtsaq, bastapqy kórsetkish 62 gektarǵa azaıǵan. Osy derekke qarap-aq óńirde keıingi jyldary esirtkimen kúres jumysy jolǵa qoıyla bastaǵanyn ańǵarý qıyn emes.
Jańadan ázirlengen kartadaǵy málimetke zer salsaq, qarasorany ósirý aýmaǵy keıbir aımaqta aıtarlyqtaı azaıǵanyna qaramastan, qaısybir aýdannyń aýmaǵynda artyp otyr.
«Polısııa departamentiniń qyzmetkerleri esirtkini jetkizý arnalaryn joıý jumystaryn atqaryp jatyr. Júıeli jumys arqyly uıymdasqan qylmystyq toptardyń jolyn kesýge den qoıyp otyrmyz. Bul is aldaǵy ýaqytta da jalǵasady.
Endi polısııa qyzmetkerleri jańartylǵan derektermen jumys isteıtinin aıta ketken jón. Bul, árıne, jumysymyzdyń jeńildeýine septigin tıgizetini anyq. Jańartylǵan kartada keltirilgen derekterdi negizge ala otyryp, qarasora ázirleýshilerdi anyqtaýda barlyq bólimshede jumysty jetildire túsýge múmkindik týyp otyr. Bul óz kezeginde jedel túrde qylmystyń jolyn kesýge yqpal etedi», deıdi oblystyq polısııa departamenti esirtki qylmysyna qarsy is-qımyl basqarmasynyń basshysy Álim Bajyqbaev.
О́ńirdegi qarasora ósiriletin aýmaqty tolyq anyqtaý jumysyn júrgizý qajettigi birneshe jyl buryn aıtylǵan bolatyn. Polısııa departamentiniń basshylary bul jumysqa der kezinde kiriskeni kóńil qýantady. Jalpy alǵanda, keıingi birneshe jyldyń bederinde esirtkini jetkizý arnalaryn joıýda óńirde aýyz toltyryp aıtarlyqtaı jumystar atqarylyp jatyr.
Jambyl oblysy