Premer-mınıstr Oljas Bektenovtiń tóraǵalyǵymen ótken Úkimet otyrysynda sý tasqynynan zardap shekken óńirlerdegi jóndeý-qalpyna keltirý jumystarynyń barysy qaraldy, dep habarlaıdy Egemen.kz.
О́nerkásip jáne qurylys mınıstri Qanat Sharlapaevtyń aıtýynsha, Qazaqstanda sý tasqyny saldarynan 18 005 jyljymaıtyn múlik búlingen. Onyń 17 295-iniń zertteý nátıjesi daıyn.
«Bir apta ishinde resimdelgen qorytyndylardyń ósimi 1 375-ti qurady. 2 245 nysan qurylysy, jyljymaıtyn múlik naryǵynda 5 235 úı men páter satyp alý, 9 819 turǵyn úıdi jóndeý josparlanǵan», deıdi mınıstr.
О́nerkásip jáne qurylys mınıstri Qanat Sharlapaev málimdegendeı, TJ saldarynan baspanasynan aıyrylǵan azamattarǵa turǵyn úı berý qaǵıdalaryna túzetýler engizilýine baılanysty BQO-da turǵyn úı sany 4 042-den 6 061-ge deıin ósti.
«Búgingi tańda elimizde 1 828 úıdiń qurylysy bastaldy, bul 81%-dy qurap otyr. Bul rette BQO men Aqmola oblysynda tómen qarqyn men jumyldyrý oryn aldy. Aqtóbe oblysy men BQO-da 2 122 úı áli sý astynda qalyp otyr. Tehnıkalyq tekserý qorytyndylarynyń joqtyǵyna qaramastan, menshik ıeleri úshin turǵyn úı salý jáne satyp alý sharalary qabyldanyp jatyr», dedi vedomstvo basshysy.
Onyń aıtýynsha, jyljymaıtyn múlki jaramsyz dep tanylǵandar úshin 1 943 nysan satyp alyndy. Búgingi tańda 1 772 úıdiń ıesi tólemderin alǵan. Ahýaldyq ortalyq jáne Eńbek resýrstaryn damytý ortalyǵy barlyq kezeńderde EGOV jáne «Áleýmettik kómek» AAJ arqyly azamattardan ótinishterdi qabyldaý jáne óńdeý prosesin baqylaıdy. Sıfrlandyrý esebinen iske asyrý kezeńderi boıynsha monıtorıngi qamtamasyz etildi. Ár óńirde jappaı qurylys alańdarynda táýlik boıy onlaın qoljetimdiligi bar 52 kamera ornalastyrylǵan. Aldaǵy aptada Aqtóbe oblysynda qosymsha 6 kamera qosylady.