«Shymbulaq» taý shańǵysy kýrorty Gınnestiń rekordtar kitabyna engen. «Álemdegi eń bıik túngi taý shańǵy trassasy» ataýyn alǵan.
Álemdik rekord ornatý erekshelik pen turaqtylyqty talap etedi. Al kýrorttyq aımaqqa qoıylatyn talap – qıynnyń qıyny. Mysaly, shańǵy tebetin jol Halyqaralyq shańǵy federasııasynyń talabyna sáıkes kelýi kerek. Bul talap boıynsha Gınnestiń rekordtar kitabyna ený úshin 3100 metr bıiktik belgilengen. Al «Shymbulaq» teńiz deńgeıinen 3200 metr bıiktikte ornalasqan.
95 til biledi
Qansha til bilseń, sonsha álem ashasyń. Erekshe qabiletiniń arqasynda 95 til úırengen Máskeý qalasynyń turǵyny Vıllı Melnıkov álemdi tańǵaldyrǵan.
Veterınarııa akademııasyn bitirgen daryndy jigit kezinde Aýǵanstan soǵysynda dáriger bolǵan. Qyzmet barysynda til úırenýge qatty qyzyǵypty. Jan-jaqty izdenip, álem halyqtarynyń 95 tilin oqyp-úırenip alypty. Sonymen qatar Vıllı qoly qalt etkende óleń jazyp, sýret te salǵan.
QR kodtyń avtory
Qazir QR kod-syz tirligimiz bitpeıdi. Osy bir erekshe ádistiń bastaýy japon azamatynyń sharasyzdyǵynan paıda bolǵan desedi.
Japondyq «Denso» mashına jasaý korporasııasy shtrıh-kodtardy skanerleýge kóp ýaqyt jumsapty. Sonda basshylyq qyzmetkerlerden aqparat sanyn kóbeıtýdi talap etip, sógis jarııalaǵan. Bul másele ınjener Masahıro Haranyń shymbaıyna batqan. Ári oılanyp, beri oılanyp ábigerge túsedi. Kenet esine tórtburyshty taqtada qara jáne aq tastarmen oınalatyn «GO» oıny túsedi. Osy oıynnyń ereksheligi ınjenerdi shabyttandyryp, QR kod oılap tapqan.