ASTANA. 25 sáýir. Máskeýdiń Domodedovo áýejaıynda urylar 3,3 mıllıon dollardy qurylys qoqysymen aýystyryp ketken. Reseı polıseıleri áýe júginen urlanǵan aqshaǵa qatysty qylmystyq istiń aq-qarasyn anyqtady. Bul týraly today.kz habarlady.
Máskeýge Novosibirden kelgen qymbat júkti qabyldaý kezinde eki qapqa salynǵan aqshanyń ornynda qurylys qoqysy bolǵan.
Reseı Ishki ister mınıstrliginiń Máskeý qalasy boıynsha baspasóz qyzmeti taratqan málimetke súıensek, Novosibir-Domodedovo baǵytymen Máskeý qalasyna kelgen júktiń salmaǵy men plombasynda sáıkessizdikter anyqtalǵan. Nátıjesinde, eki qaptaǵy 3,3 mıllıon dollardyń ornyna qurylys qoqysy shyqqan.
Reseı valıýtasymen esepteý kezinde shyǵyn kólemi 180 mıllıon rýbldi quraǵan. Keıinnen bul qylmysqa qundy zattardy tasymaldaýmen aınalysatyn kompanııanyń úsh qyzmetkeri kúdikti dep tanylǵan.
Buryn Domodedovoda júk tasmyldaýshy bolyp jumys istegen úsheýi 2014 jyly jumystarynan shyǵarylǵan eken. Júkterdi túsirý tehnologııasyn jaqsy meńgergen olar urlyqty áýejaıda jasaǵan. Aqshanyń joǵalǵany belgili bolǵannan keıin polıseıler áýejaıdyń qaýipsizdik qyzmetimen birge bul qylmysty bir táýliktiń ishinde áshkereledi.
Urlyq jasaǵandardyń barlyǵy óz kánilaryn moıyndap otyr. Qazirgi tańda bul oqıǵa boıynsha Reseı Federasııasy Qylmystyq kodeksiniń 158-baby 4-bóligi («Urlyq») boıynsha qylmystyq is qozǵaldy. Bul bap boıynsha urylar eń aýyr jaza – 10 jylǵa deıin bas bostandyǵynan aıyrylýy múmkin.
Elaman Qońyr.
Derek: today.kz.
Sýret: webpark.ru.