ASTANA. 25 sáýir. Hokkeıden álem chempıonatynyń I dıvızıonynda baq synaǵan Qazaqstan quramasy barlyq oıynda jeńiske jetti. Sońǵy kezdesýin búgin toptaǵy basty qarsylasy sanalǵan Italııaǵa qarsy ótkizip, 3:0 esebimen basym tústi. Bul týraly egemen.kz habarlady.
Andreı Nazarovtyń shákirtteri 7-mınýtta esep ashty. Komandasyn alǵa shyǵarǵan – Evgenıı Rymarev. Al qalǵan eki gol úshinshi kezeńde soǵyldy. 46-mınýtta Talǵat Jaılaýov mergendigimen kózge tússe, 54-mınýtta Alekseı Voronsov býllıt arqyly esepti 3:0-ge jetkizdi.
Osymen quramamyz atalǵan syndaǵy barlyq oıynda jeńiske jetti. Tek Polshaǵa qarsy kezdesýde ǵana bir shaıba aıyrmasymen basym túsken Qazaqstan qalǵan matchtardyń barlyǵynda qarsylastaryn iri eseppen san soqtyrdy. Naqty aıtar bolsaq, Ýkraınany 5:2, Vengrııany 5:0, Japonııany 7:2 jáne Polshany 3:2 esebimen tize búktirdi. Nátıjesinde kelesi jylǵy álemdik dodada elıtalyq dıvızıonda óner kórsetý múmkindigine ıe boldy. Atalǵan saıys 2016 jyly Reseıdiń Máskeý men Sankt-Peterbýrg qalalarynda ótedi.
Taǵy bir erekshe aıtyp óter jaıt, qaqpashymyz Pavel Polýektov chempıonat barysynda eki oıynda qaqpasyna gol jibergen joq.
«A» tobynan elıtalyq dıvızıonǵa beriler ekinshi joldamany búgin túnde Vengrııa men Polsha sarapqa salady. Álem chempıonaty I dıvızıonynyń «A» tobyndaǵy oıyndar Polshanyń Krakov qalasynda ótkenin esterińizge sala keteıik.
Elaman Qońyr.
Derek: egemen.kz.
Sýret: facebook.com.