ASTANA. 26 sáýir. Búgin tańerteń saǵat 7:00-de elimizde bastalǵan Qazaqstan Respýblıkasy Prezıdentiniń saılaýynda 9 514 988 saılaýshy daýys berýleri tıis. Bul týraly Bnews.kz habarlady.
«Tańǵy saǵat 07.00-den bastap elimizde saılaý ýchaskeleri ashyldy, el turǵyndary ózderi qalaǵan kandıdatyna keshki 20.00-ge deıin daýys bere alady», - delingen habarlamada.
Saılaýshylar úsh úmitkerdiń arasynan eń tańdaýlyny tańdaıdy. Olardyń arasynda Nursultan Nazarbaev, Turǵyn Syzdyqov jáne Ábilǵazy Qusaıynov bar.
«2015 jyldyń 5 sáýirindegi jaǵdaı boıynsha, daýys berý quqyǵyna 9514988 qazaqstandyq ıe. Daýys berý bıýlletenderi, tizimge ilingen saılaýshylardyń jalpy sanynan 1% rezervti qosa alǵanda, 9 610 138 dana. Jalpy, Qazaqstan Respýblıkasy Prezıdentiniń kezekten tys saılaýyn uıymdastyrýǵa jáne ótkizýge 9965 saılaý ýchaskesi iske qosylǵan. Onyń ishinde 9741 ýchaskelik saılaý komıssııasy, sondaı-aq 171 aýdandyq, 37 qalalyq jáne 16 oblystyq, Astana jáne Almaty qalalarynyń aýmaqtyq saılaý komıssııalary. Jalpy alǵanda, olardyń quramynda 70 myń adam bar», - delingen habarlamada.
Esterińizge sala keteıik, Prezıdent saılaýyna qatysý úshin 1024 halyqaralyq baqylaýshy men BAQ ókili tirkeldi.
Prezıdent saılaýyn ótkizý týraly bastama 14 aqpanda Qazaqstan halqy Assambleıasy keńesiniń otyrysynda kóterildi. Keńes jumysyna Parlament depýtattary, respýblıkalyq etnomádenı birlestikter basshylary, ÚEU, QHA ǵylymı-sarapshylyq keńesi músheleri, BAQ ókilderi qatysty.
Keńes músheleri atap ótkendeı, jahandyq ekonomıkalyq daǵdarys jaǵdaıynda jáne kúrdeli halyqaralyq kún tártibinde kezekten tys saılaý ótkizý bizdiń elimizge «Nurly jol bolashaqqa bastar jol» baǵdarlamasyn, «Qazaqstan-2050» Strategııasynda belgilengen elimizdiń damý baǵyttaryn júzege asyrýǵa múmkindik beredi.
Qurysh Nurymbet.
Derek, sýret: Bnews.kz.