Túrkistan oblysy Kentaý qalasynyń oqýshysy Aıdos Qojanov Ulttyq biryńǵaı testileýden 138 ball jınady. Bul kórsetkish ázirge, óńir boıynsha eń joǵary nátıje. Ustazdary bolashaqta matematıka pániniń muǵalim bolǵysy keletin Aıdostyń jyl boıy baıqaý synaqtarynda birinshi oryndy bermeı kelgenin aıtady.
Aıdos syndy úzdikterdiń qatary aldaǵy synaqtardan keıin qalyńdaı túserinen úmit mol. Olaı deıtinimiz óńirde 1704 túlek «Altyn belgi» ıesi atandy, sondaı-aq 2400 oqýshy «Úzdik attestat» aldy. Úzdikteri kóp mektep te barshylyq. Mysaly, Jetisaı aýdany B.Momyshuly atyndaǵy №6 mektep-gımnazııasyn bıyl bitirgen 88 oqýshynyń 27-ine – «Altyn belgi», 14 túlekke – «Úzdik attestat» tapsyryldy. Jalpy, oblysta bıyl Ulttyq biryńǵaı testileýge qatysýǵa 27 340 oqýshy ótinim bildirgen.
Túlekterdiń mamandyq tańdaýda qatelespeı, qalaǵan oqý ornynda bilim alýy da mańyzdy. Bul oraıda joǵary oqý ornynan keıingi bilimi bar kadrlardy daıarlaý sapasyn kóterý, eńbek naryǵynda básekege qabiletti, jumys berýshilerdiń talabyna jaýap bere alatyn, zamanaýı qural-jabdyqtardy meńgergen mamandar daıarlaýǵa erekshe nazar aýdarylyp otyr. Oblysta medısına mamandaryna 250-ge jýyq kadr tapshylyǵy bar. Mamandardyń jetispeýshiligin sheshý maqsatynda qarajat bólingen. Qajetti kadrlardy daıarlaýǵa arnalǵan memlekettik bilim berý tapsyrysyn qalyptastyrý jáne bólý jónindegi komıssııa otyrysynyń sheshimimen bakalavrıatqa – 50 oryn belgilenip otyr. Onyń 15-i «Densaýlyq saqtaý» mamandyǵy bolsa, 35-i «Aqparattyq-kommýnıkasııalyq tehnologııalar» mamandyǵy boıynsha. Al «Densaýlyq saqtaý» mamandyǵynda rezıdentýrada daıarlaýǵa 139 oryn bólinip otyr. Sondaı-aq jańa oqý jylyna 15500 orynǵa memlekettik tapsyrys berildi. Onyń basym bóligi tehnıkalyq, qurylys jáne aýylsharýashylyq, aqparattyq-kommýnıkasııalyq tehnologııalar, bilim salalaryna baǵyttalǵan.
Túrkistan oblysy