Úkimet múmkindigi shekteýli jandardyń ózderin qoǵamnyń tolyqqandy músheleri retinde sezinýi úshin múmkin bolǵan jaǵdaıdyń bárin jasaýda. Múgedekterdi jumyspen qamtý qolǵa alyndy, qolarbaǵa tańylǵandardyń júrip-turýy úshin ǵımarattarda pandýs ornatýylýda, múgedel jandardy turǵyn úımen qamtamasyz etý jyl ótken saıyn jaqsara túsýde. Ásirese, damý múmkindigi shekteýli balǵyndardyń múgedek bolyp qalýynyń aldyn alýǵa, olardy der kezinde emdep-saýyqtyrýǵa, qatarǵa qosýǵa basa nazar aýdarylýda.
Derek kózine súıensek, oblysta damýynda belgili bir aqaýy bar 5169 on segiz jasqa deıingi bala bar eken, sonyń 2536-sy múgedek. Shyny kerek, qazirgi ýaqytta mundaı damý múmkindigi shekteýli balalar memlekettiń qamqorlyǵyn burynǵydan góri kóbirek sezine bastady. Sonyń bir dálelindeı, jaqynda Aqtóbe qalasyndaǵy №4 orta mektep janynan psıhologııalyq-pedagogıkalyq túzeý kabıneti ashyldy.
Osy kabınettiń saltanatty ashylý rásiminde sóz alǵan oblys ákimi Arhımed Muhambetov oblys kóleminde densaýlyǵynda kináraty bar jas urpaqtyń jan-jaqty jetilýi, densaýlyǵyn túzeýi baǵytynda biraz sharýalar atqarylyp jatqanyn jetkizdi. О́ńir basshysynyń aıtýynsha, qazir Yrǵyzdan basqa aýdandardyń barlyǵynda psıhologııalyq-pedagogıkalyq ortalyqtar jumys isteýde eken. Sonymen birge, oblys ákimdiginiń «Dara» jeke qorymen birlesip, «Samuryq-Qazyna» ulttyq ál-aýqat qory» AQ-tyń qarjylaı qoldaýymen osy ortalyqty paıdalanýǵa berýin bul baǵytta jasalyp jatqan ıgilikti isterdiń naqty kórinisi dep baǵalady.
«Dara» jeke qorynyń quryltaıshysy Gúlnár Dosaeva bul ortalyqta jyl boıyna 100-den astam damý múmkindigi shekteýli balaǵa pedagog-psıholog, muǵalim-defektolog, tıflopedagog, sýrdopedagog, emdik deneshynyqtyrý nusqaýshysy, basqa da mamandar tarapynan kásibı, keshendi kómekter tegin kórsetiletinin aıtty. Kabınette jumys isteıtin maman-pedagogtar Reseıde, ózimizde qaıta daıarlaýdan ótken. Olarǵa elimizdiń jáne shetelderdiń bilikti ǵalymdary men pedagogtary dáris oqyǵan, tájirıbelerin úıretken. Osy maqsatta segiz ret semınar ótkizilgen.
Bul aýmaqta kedergisiz orta qalyptastyrylǵan. Iаǵnı pandýs, kireberisteri keń esikter, basqa da jaǵdaılar jasalǵan. Kabınetter zamanaýı qural-jabdyqtarmen, qondyrǵylarmen jaraqtandyrylǵan. Sonyń bárine «Samuryq-Qazyna» ál-aýqat qory» AQ-tan 30 mıllıon teńge bólingen. Munda balalary osynda túzeý sharalarynan ótetin ata-analar úshin psıhologııalyq qoldaý klýbyn uıymdastyrý kózdelýde. Jańa bólimshede ótken ǵasyrda ómir súrgen ıtalııalyq dáriger, ǵalym-fılosof Marııa Montessorıdiń júıesi de paıdalanylmaqshy.
– Bizde, eń aldymen, pedagog-mamandar men ata-analardyń bir múdde aıasynan tabylýy qaıtarymdy bolmaq, bólimsheniń materıaldyq jabdyqtalýy, mamandarmen qamtylýy oıymyzdan shyǵady, endi josparǵa sáıkes jumys isteımiz, – deıdi kabınet meńgerýshisi Iаpýraı Tólenova.
Oblystyq bilim basqarmasy bólim basshysy Altyngúl Áýesqan psıhologııalyq-pedagogıkalyq kabınetiniń jalpy bilim beretin mektep bazasynda ornalasýy múmkindigi shekteýli balalardyń ózderin qatarlarymen teń sezinýine, ómirge degen qulshynysyn oıatady deıdi. О́ńir basshysy jańa túzeý ortalyǵynyń baıǵazysyna 5 mıllıon teńge usyndy. «Samuryq-Qazyna» ál-aýqat qory» AQ qashyqta turatyn múmkindigi shekteýli búldirshinderdi tasymaldaý úshin jeńil ınvataksıdi syıǵa tartty.
Satybaldy SÁÝIRBAI,
«Egemen Qazaqstan».
Aqtóbe oblysy.