Búginde elge qyzmet etemin degen bilikti de bilimdi jastarǵa memlekettik qyzmetke ornalasý jeńildedi. О́tken jyly memlekettik qyzmetke kirýdegi artyq kedergilerdi joıý maqsatynda Memlekettik qyzmet isteri agenttiginiń bastamasymen joǵary oqý oryndaryn memlekettik grantpen ári GPA 3,33-ten tómen emes kórsetkishpen bitirgen túlekterdi aýdan jáne aýyldyq jerlerdegi tómengi laýazymdarǵa konkýrssyz tikeleı taǵaıyndaý múmkindigi qarastyryldy.
Zamandastarymyzdyń arasynda shetel asyp, bilimin jetildirip kelgen talantty, talapty jastar jeterlik. Árkim ártúrli eńbek jolyn tańdap, bolashaǵyn bir salamen baılanystyrǵysy keledi. Ýnıversıtet bitire sala memlekettik qyzmetke aralasý – tek mansaptyq ósýińe ǵana emes, ómirdegi bar qıyndyqqa tótep berý, bilimińdi shyńdap, biligińdi tanytatyn mol múmkindik. Sondyqtan bolar, bala kezden memlekettik qyzmetshini kóz aldyma elestetkende únemi abyroıly, salmaqty, bilimdi, zııaly tulǵany elestetetinmin. Memlekettik qyzmetshi bolýǵa sol úshin de kúnnen-kúnge qyzyǵýshylyǵym arta tústi.
Fılosofııada, ádebıette ekzıstensıalızm degen uǵym bar. Ol – adam ómiriniń máni, onyń tulǵalyq bolmysy, ıaǵnı adamnyń ózindik «menin» tanýy – ómirdiń mán-maǵynasyn túsiný. Meniń tulǵalyq bolmysymdy qalyptastyrýǵa úlken oqý ordasy – ál-Farabı atyndaǵy Qazaq ulttyq ýnıversıteti kóp kómegin tıgizdi. Joǵary oqý ornyn aıaqtaǵan soń birden memlekettik qyzmetke kelýdi oılastyrdym. Memlekettik qyzmetke kirýdegi talaptarmen tanysa bastaǵan kezde, Memleket basshysynyń engizip jatqan jańalyǵyn teledıdar arqyly baǵdarlamalardan kórip, qyzyǵýshylyǵym oıandy. Búginde memlekettik qyzmetke kirýdiń jeńildetilgen jobalary, ońtaıly talaptary – jastar úshin jeńil, ári eshqandaı moraldyq aýyrtpalyqsyz ótetini men úshin qýatty qoldaý boldy, qatty qýantty. Sebebi kez kelgen joǵary oqý ornyn aıaqtaǵan túlektiń jumysqa esh kedergisiz kirýi jas mamanǵa aıryqsha motıvasııa, kúsh-jiger syılap, erteńgi maqsatyna úmitpen qaraýyna múmkindik beredi.
Memleket tarapynan kórsetilip jatqan bul qoldaý men sheshim úlken qurmetke laıyq dep sanaımyn. Jastardyń bastapqy tájirıbesiz memlekettik qyzmetke taǵaıyndalyp, jumys isteýleri jastardy mansaptyq ósýge umtylýǵa, qoǵamdy damytýǵa, barlyq azamat úshin qolaıly orta qurýǵa yqpal ete otyryp, memlekettik salaǵa ınnovasııalyq tásilderdi engizýge yntalandyrady. Sonymen qatar kadr tapshylyǵyn azaıtyp, óńirlerde, aýyldyq okrýgterde áleýmettik mańyzy bar jobalarmen jumys isteýge jáne el men qoǵamnyń damýyna óz úlesterin qosýǵa yqpal etedi.
Memlekettik qyzmetke konkýrstyq irikteýsiz tikeleı taǵaıyndalý – tek jas mamandarǵa emes, osy jańalyqty estigen jas túlekter men bolashaq mamandarǵa da úlken ynta, qyzyǵýshylyq týdyratynyna senimdimin. Muny estigen stýdentter oqýdy úzdik aıaqtaýǵa, úlgili tártip kórsetýge tyrysady, qatarynyń aldy bolýǵa umtylady. Memleket tarapynan bul – óte utymdy sheshim, oıly qadam.
Memlekettik qyzmetke konkýrstyq irikteýsiz taǵaıyndalǵan jas maman retinde jastardyń osy múmkindikti durys paıdalanýyn qalar edim. Mysaly, ózim memlekettik qyzmetke kelý arqyly kásibı-tulǵalyq bolmysymdy jetildirip kelemin. Memlekettik qyzmet maǵan eldik jáne qoǵamdyq múddelerge ádil jáne adal qyzmet etýge, óz kúsh-jigerimdi, bilimim men tájirıbemdi otanymyzdyń damýyna jumsaýǵa úıretýde. Týǵan jerime kelip, Moıynqum aýdany ákimi apparatynyń bas mamany bolý – men úshin úlken mártebe. Osyndaı jańashyldyq arqyly mol múmkindik syılaǵan memleketke alǵysym sheksiz. Sebebi bul bastama memlekettik qyzmetti sapaly jańǵyrtýdyń negizi bolary sózsiz.
Aıhanym SERIKOVA,
Moıynqum aýdany ákimi apparaty uıymdastyrý-ınspektorlyq bóliminiń bas mamany
Jambyl oblysy