Resmı ókil retinde tirkeldi

Abý Dabıde Qazaqstannyń Birikken Arab Ámirlikterindegi elshisi Qaırat Lama Shárip Jańarmaly energııa kózderi jónindegi halyqaralyq agenttiginde (IRENA) Qazaqstan Respýblıkasynyń resmı ókili retinde akkredıtteldi. Akkredıtteý saltanatynda Jańar­maly energııa kózderi jónindegi halyq­aralyq agenttiktiń bas dırektory Adnan Amın óz sózinde atalǵan mańyzdy qadamdy Qazaqstannyń IRENA-men ynty­maqtastyǵyn odan ári keńeıtý men ny­ǵaıtýǵa baǵyttalǵan ıgi nıet dep joǵary baǵalady. IRENA – Germanııa úkimetiniń bastamasymen jáne Ispanııa men Danııanyń belsendi qoldaýynyń negizinde 2009 jylǵy 26 qańtarda Bonn qalasynda qurylǵan halyqaralyq uıym. Jańa uıymdy qurýdyń úlgisi retinde Atom energııasy jónindegi halyqaralyq agenttik (MAGATE) alyndy. 2010 jyl­dyń 25 qazanynda IRENA men qabyldaýshy tarap (BAÁ) arasynda Halyqaralyq agenttiktiń shtab-páterin Abý Dabıge kóshirý týraly kelisimge qol qoıyldy. Qazirgi ýaqytta 135 memleket (134 memleket jáne Eýropalyq odaq) IRENA-ǵa múshe bolyp tabylady, al 36 el uıymǵa kirý aldynda tur. 2013 jyldyń 22 naýryzynda osy halyqaralyq uıymnyń jarǵysyn ratıfıkasııalaǵannan keıin Qazaqstan IRENA-nyń tolyq quqyqty múshesi bolyp esepteledi. Uıymda 26 memlekettiń turaqty ókilderi tirkelgen. Suhbat barysynda Adnan Amın men Qaırat Lama Shárip Abý Dabıde Japonııanyń tóraǵalyǵymen ótetin IRENA Assambleıasynyń 5-shi sessııasyna (uıymnyń joǵary organy) Qazaqstan Respýblıkasynyń Energetıka mınıstri V.S.Shkolnık bastaǵan qazaqstandyq delegasııa qatysýynyń uıymdyq-hattamalyq jáne ekijaqty yntymaqtastyq máseleleri boıynsha pikir almasty. Atalǵan sessııada Qazaqstan Kenııa, Jańa Zelandııa jáne Perýmen qatar, Assambleıanyń vıse-prezıdenti retinde tanystyrylady. IRENA Assambleıasymen qatar, Abý Dabıde Turaqty damý aptalyǵy (Abu Dhabi Sustainability Week) ótedi. ADSW 2013 jyldan bastap jyl saıyn ótkiziledi, mańyzdylyǵy jaǵynan Taıaý Shyǵystaǵy energetıka men turaqty damý salasyndaǵy eń iri jáne tanymal aptalyqqa aınalǵan. ADSW sheńberinde birneshe derbes forýmdar ótedi. Olardyń bastysy – Bolashaq energııasy jónindegi 8-shi álemdik sammıt– 2015 (World Future Energy Summit), Sý resýrstary máselesi jónindegi 3-shi halyqaralyq sammıt (International Water Summit), Jańarmaly energııa kózderi jónindegi halyqaralyq konferensııa (Abu Dhabi International Renewable Energy Conference) jáne Qaldyqtardy baqylaý men kádege jaratý jónindegi 2-shi halyqaralyq kórme («EcoWASTE»). «Egemen-aqparat».