Jambyl tehnologııalyq jeńil jáne tamaq ónerkásibi ınstıtýtyn bitirip, Qazaly aýdandyq qarjy bóliminiń kirister boıynsha ınspektory qyzmetine kiriskeni keshe ǵana sııaqty edi. Alty uldyń ortasynda ósken erke qyzǵa Qazynagúl degen esimdi ájesi bergen eken. Azan shaqyryp qoıǵan aty bolashaq kásibine jol ashypty. Qazir keıipkerimiz Qazynagúl Bákenovanyń bıýdjet salasynda qyzmet etip kele jatqanyna 40 jylǵa jýyqtapty.
Sol kezdegi zaman talabyna saı orys mektebinde bilim aldy. Ákeleri Sýhan ómirden erte ótip, jeti balany analary Raýshan jetkizdi. Jalpy, qaı salada da qyzmettiń barlyq satysynan ótken mamannyń tájirıbesi tolysady.
«Bizdiń kezimizde jas kadrlarǵa qoldaý kóp edi. Jumysyn jańa bastaǵandardy tájirıbeli mamandarǵa bekitip beretin. Alǵash jol kórsetken tálimgerim soǵys ardageri Kúntýǵan Kóshimov degen aǵamyz boldy. Qazir Almaty qalasynda turatyn Kemal Smaǵulov aǵaıdan da úırengenim kóp. Jumysta jańa bastaǵan sáttegi Zeınep Tasmaǵambetova, Ultýǵan Ábdibaeva, Bazarkúl Nysanǵalıeva, Jaqsybıke Jumahmetova, Anar Ánııazovadaı apaılardyń janashyrlyǵy esten ketpeıdi. Ásirese marqum Zeınep apaı 20 jyldaı bir kabınette qatar otyryp, maǵan jumystan bólek adamdarmen qarym-qatynastyń qyr-syryn úıretti. Aldyńǵy býynnyń osyndaı qamqorlyǵy arqasynda maman retinde qalyptastyq», deıdi Qazynagúl Sýhanqyzy.
Ár jyldary aýdandyq ekonomıka jáne bıýdjettik josparlaý bóliminiń bólimshe jetekshisi, sektor meńgerýshisi, bólim basshysynyń orynbasary qyzmetterin atqarǵanda aldyńǵy býynnan úırengeniniń kómegi kóp tıdi. Byltyrdan beri aýdandyq ekonomıka jáne qarjy bólimi basshysynyń orynbasary qyzmetin atqaryp keledi.
Keıde eki dáýirdegi memlekettik qyzmet salasyn salystyratyny bar. Keńes kezinde bólimde revızııalyq fýnksııa da bar edi. Sol arqyly mekemelerge tekserý júrgiziletin. Qazir bul salanyń jaýapkershiligi óte joǵary. Táýelsizdiktiń alǵashqy jyldaryndaǵy qıyndyq memlekettik qyzmettegilerge de jeńil tıgen joq. Talaı bilikti mamandar jaýapkershiligi kóp, jalaqysy az jumysyn tastap, basqa salalarǵa ketip jatty. Biraq osy qıyndyqta ta Qazynagúl qyzmet aýystyrýdy oılamapty.
2000-jyldar basynda Qyzylorda oblysy is qaǵazdaryn alǵash bolyp memlekettik tilge kóshirgeni este. Sol kezde orys mektebin bitirgendikten azdap qınaldy. Osy tusta bólim basshysy, jas ta bolsa biliktiligimen tanylǵan myqty maman Gúlbaqyt Narmaǵambetovanyń kómegi kóp tıdi.
Qyzmette júrip talaı talapty jasqa jol kórsetti. Solardyń biri – Nurdáýlet Aımaǵambetov bıýdjettik josparlaý sektorynyń meńgerýshisi. Bıýdjettiń qyr-syryn ıgertýge jasaǵan járdemi zaıa ketpedi. Qazir shákirti bolashaǵynan úmit kúttiretin mamannyń birine aınaldy.
«Kóp jyldan beri baǵamdaǵanym – burynǵy qyzmetker men búgingi mamannyń aıyrmashylyǵy jer men kókteı. Keıde basshylyqtyń eskertpesin kótere almaı, qabaǵy túsken jas áriptesterim keledi. Ondaıda baıaǵyda ózime qamqorlyq tanytyp, qanatynyń astyna alǵan qyzmettes apalarymnyń úlgisimen jón-jobasyn aıtyp, arqasynan qaǵyp qoıamyn. О́ıtkeni kóp adamnyń qolynan shyǵatyn jumystyń nátıjesi de, sapasy da ujymnyń birligine baılanysty. Shynyn da, syryn da jasyrmaıtyn jastarmen sóılese otyryp, kezindegi áriptesterim eske túsedi. О́mir jolymda osyndaı jaqsy jandarmen qyzmettes bolǵanyma shúkirlik aıtamyn», deıdi Q.Bákenova.
Arqa súıer azamaty Bereke Rahmetalıev dúnıeden ozǵanda jaqyn-jýyqtarymen qatar qyzmettesteriniń qoldaýymen eńse tiktedi. Keıipkerimiz qyzmette júrip bala tárbıesin de tys qaldyrmady. Balalardyń úlkeni Qymbat Berekeqyzy qazir Germanııadaǵy Rozenhaım qalasynda densaýlyq saqtaý salasyndaǵy sarapshy qyzmetin atqarady. Odan keıingi Gúljaınasy Qyzylordadaǵy E.Áýelbekov atyndaǵy daryndy balalarǵa arnalǵan №4 oblystyq mektep-ınternatynda aǵylshyn tiliniń muǵalimi. Uly Aıan aýdandyq qoǵamdyq damý bóliminiń bas mamany. Kenjesi Aqbota L.N.Gýmılev atyndaǵy Eýrazııa ulttyq ýnıversıtetinde oqıdy.
Memlekettik qyzmettegi 40 jyly izsiz emes. Aýdandaǵy bar salanyń tabysynda maman retinde keıipkerimizdiń de úlesi bar.
Qyzylorda oblysy,
Qazaly aýdany