«Taza Qazaqstan» jalpyulttyq ekologııalyq aksııasy aıasynda buǵan deıin de áldeneshe aýqymdy is-sharalar uıymdastyrǵan Ulytaý oblysynda maýsymnyń sońǵy dúısenbisi barlyq qala, aýdandarda tazalyq aksııalarynyń ótýimen erekshelendi.
Aksııaǵa barlyǵy óńir boıynsha 2 myńnan asa azamat atsalysyp, 138 áleýmettik nysan men 13 ónerkásip, jeke kásip aýmaǵy qoqystan tazartyldy. Budan bólek, tazalaý jumystary 61 mádenı-tarıhı eskertkishtiń aınalasynda da júrgizildi. Oblys boıynsha 158 tonna qoqys jáne turmystyq qatty qaldyqtar shyǵaryldy. Barlyǵy 245 ujym qatysqan tazalyq is-sharasynda oblystyń 76 gektar aýmaǵy qamtyldy.
Tazalyq is-sharalaryna «Jasyl el» eńbek jasaqtary aıryqsha belsendilikpen atsalysty. Ekologııalyq is-sharalarǵa qatysýshylar arasynda sondaı-aq, jergilikti bılik, qoǵamdyq uıymdar, stýdentter, belsendiler jáne qarapaıym turǵyndar da boldy.
Aksııa árbir qala, aýdanda ózindik sıpatymen ótti. Aıtalyq, Jezqazǵan qalasynda turǵyndar men eńbek ujymdary negizgi kósheler men saıabaq, skverlerdi tazartyp, jasyl jelekterge kútim jasap, gúlzarlardy retke keltirse, kenshiler qalasy sanalatyn Sátbaevta negizinen eńbek ujymdary óndiristik mekemelerdiń aýmaǵyn tazalap, syrlaý, ákteý jumystaryn atqardy.
«Sátbaev qalasy buryn tazalyǵymen erekshelenip turatyn. Keıingi kezde sol tártibimiz sál bosańsyp ketkendeı bolǵan edi. «Taza Qazaqstan» aksııasy arqasynda qalada umytyla bastaǵan senbilik ótkizý tárizdi dástúrimiz qaıta jandandy. Bul is-sharalarǵa jastardyń belsendi qatysýy qýantarlyq», deıdi «Qazaqmys» korporasııasy» JShS «Jastar bolashaq» uıymynyń tóraǵasy Lýıza Mınbaeva.
Qarajal qalasynyń turǵyndary bul kúni aýlalaryn tazalap, ruqsat etilmegen oryndarǵa tógilgen qoqystardy arnaıy polıgonǵa shyǵardy.
Oblystyń Jańaarqa, Ulytaý aýdandaryndaǵy tazalyq aksııalary ózen, kól men bulaqtardyń aınalasyn retke keltirýge baǵyttaldy. Sonyń nátıjesinde, Ulytaý aýdany terrıtorııasyndaǵy «Kúmisbulaq», «Tasbulaq» bulaqtarynyń kózi ashylyp, aınalasy tazartylyp, kelýshilerge qolaıly jaǵdaı týǵyzý maqsatynda abattandyrý jumystary júrgizildi. Al jańaarqalyqtar bolsa, Sarysý ózeniniń boıyn qoqystan tazalap, jaǵajaılardy retke keltirdi.
Tazalyq aksııalary aıasynda oblystyń qala men aýdandaryndaǵy ákimdikterdiń jaýapty mamandary jergilikti aýmaqtardaǵy kóshelerdi aralap sanıtarlyq tazalyqty tekserdi. Baıqalǵan kemshilikterdi jedel joıý jóninde tapsyrma berildi.
Ulytaý oblysy