Senattyń Áleýmettik-mádenı damý jáne ǵylym komıtetiniń tóraǵasy Nurtóre Júsip Iordanııanyń Qazaqstandaǵy Tótenshe jáne О́kiletti Elshisi Hamza Mahmýd Iýsef ál-Omarımen kezdesti, dep habarlaıdy Egemen.kz Senattyń baspasóz qyzmetine silteme jasap.
Nurtóre Júsip Qazaqstan Prezıdenti Qasym-Jomart Toqaevtyń bastamasymen elimizde júzege asyp jatqan aýqymdy saıası jańǵyrtý baǵdarlamasy týraly aıtyp berdi.
«2022 jyly tarıhı konstıtýsııalyq referendým ótip, negizgi bılik ınstıtýttary júıeli túrde qaıta jańǵyrtyldy. Reformalardyń nátıjesinde Senat óńirlerdiń múddelerin qorǵaıtyn Palata retinde qalyptasty. Qazirgi tańda Parlament jumysyndaǵy negizgi basymdyq – Prezıdentimizdiń bastamasymen júrgizilip jatqan saıası jáne ekonomıkalyq reformalardy zańnamalyq turǵydan qamtamasyz etý. Parlament soǵan sáıkes birqatar mańyzdy konstıtýsııalyq zańdar qabyldady», dedi Nurtóre Júsip.
Taraptar parlamentaralyq, saýda-ekonomıkalyq jáne mádenı yntymaqtastyqty damytýdyń keleshegin de talqylady.
Hamza Mahmýd Iýsef Ál-Omarı óz kezeginde Qazaqstanda júrgizilip jatqan qoǵamdyq-saıası ózgeristerdi joǵary baǵalady jáne Qazaqstan men Iordanııa arasyndaǵy yntymaqtastyqty odan ári nyǵaıtýǵa múddeli ekenin jetkizdi.