Sý tasqynynan zardap shekken BQO-nyń turǵyndary úshin 775 úı salynyp, memleket esebinen qosymsha 1500 páter satyp alynady. Bul týraly Terekti aýdany Podstepnoe aýylynyń turǵyndarymen kezdesken Májilis depýtaty, «Amanat» partııasy fraksııasynyń múshesi Nartaı Sársenǵalıev málimdedi, dep habarlaıdy Egemen.kz QR Parlamenti Májilisiniń baspasóz qyzmetine silteme jasap.
Eldi meken Oral qalasynan 10 shaqyrym jerde ornalasqan. Jaqynda bolǵan sý tasqynynan aýyl basqa aımaqtarǵa qaraǵanda kóbirek zardap shekken. Qarǵyn sýdyń saldarynan 481 otbasy baspanasynan aıyrylǵan.
«Barlyq dúnıe-múlik, tórt túlik sý astynda qaldy. Úıdi sý basty. Biz kópbalaly otbasymyz. Alǵashynda bizge mekteptegi evakýasııalyq pýnkte tósek-oryn berildi. Qazir baspana jaldap jatyrmyz. Memleketten materıaldyq kómek aldyq. Endi tezdetip turǵyn úı alǵymyz keledi», dedi jergilikti turǵyn Marııam Qaıratqyzy.
Qazirgi tańda Terekti aýdanynda bir qabatty 131 úıdiń qurylysy júrgizilip jatyr. Ár úıdiń jalpy aýdany – 80 sharshy metr. Podstepnoe aýylynda 106 úı salynady. Salynatyn úılerdiń qurylysyna 10 merdiger kompanııa jumyldyrylǵan. 670 úı ıesine 100 AEK (369 200 teńge) mólsherinde birjolǵy materıaldyq kómek kórsetilse, 506 úı ıesiniń materıaldyq shyǵyny ótelgen. Sonymen qatar aýylda mektepti jóndeý jumysy bastalǵan. Jol jóndeýge jáne bógetterdi qalpyna keltirý jumystaryna bıýdjetke ótinim berilgen.
«Depýtattar alǵashqy kúnnen-aq oqıǵa ornynan tabyldy. О́z basym, zardap shekken otbasylarmen birneshe ret kezdestim, sý tasqynyna qarsy is-qımyl boıynsha ákimdiktermen birge jumys istedim, baǵalaý komıssııalarynyń jumysyna atsalystym. Barlyq másele Prezıdent baqylaýynda boldy. Qazir bizdiń basty maqsatymyz – zardap shekken jandardyń barynsha tezirek qalypty ómirge oralýyna jaǵdaı jasaý, úılerdi, jeke qosalqy sharýashylyqtardy, áleýmettik ınfraqurylymdy, balabaqshalar men aýrýhanalardy qalpyna keltirý», dedi Nartaı Sársenǵalıev.
Aıta keteıik, buǵan deıin Májilis depýtattary sý tasqynymen kúresý jumystaryna barynsha kómek kórsetý úshin zardap shekken aımaqtardy aralap shyqqan edi. Depýtattar turǵyndardyń muń-muqtajyn quzyrly organdarǵa tikeleı jetkizip, qajetti resýrstardy jedel jetkizýdi uıymdastyrǵan.