Ǵylym men bilimin damytpaǵan eldiń ekonomıkasy da, saıasaty da túptiń-túbinde tyǵyryqqa tireleri anyq. Halqymyzdyń birtýar tulǵasy Shoqan Ýálıhanovtyń «Halyqtyń kemeline kelip órkendep ósýi úshin eń aldymen azattyq pen bilim qajet» degen sózi ǵylym men bilim – qoǵamnyń materıaldyq jáne rýhanı jetistikteriniń jıyntyǵy bolyp sanalatyn órkenıettiń túp qazyǵy ekenin dáleldep otyr.
Prezıdent Qasym-Jomart Toqaev Ǵylym men joǵary bilim salasyn damytýdyń 2029 jylǵa deıingi tujyrymdamasyn qabyldap, ǵylymdy damytýdyń jańa tásilin zań júzinde bekitip, memlekettiń ǵylymı-tehnologııalyq jáne ekonomıkalyq saıasatynyń ózara baılanysyn kúsheıtý qajettigin Ǵylym jáne tehnologııalar jónindegi Ulttyq keńestiń birinshi otyrysynda atap ótken edi. Endi «Ǵylym jáne tehnologııalyq saıasat týraly» zańǵa qol qoıdy. Atalǵan zań ǵylymı kadrlardy daıarlaý, olardy áleýmettik qorǵaý, ásirese jas ǵalymdardy qoldaý júıesin engizý, ǵylymdy basqarý qurylymyn jetildirý jáne ǵylym qorynyń mańyzyn kúsheıtý sııaqty ózekti máselelerdi sheshýge baǵyttalǵan. Dana Ál-Farabı óz zamanynda: «Bilim jolyna túsken jan kúndelikti kúıbeń tirshilikti oılamaýy qajet» dep, ǵalymdy áý bastan áleýmettik jaǵynan qoldaý qajettigin alǵa tartqan eken. Bul másele qazirgi kezde de ózektiligin joǵalta qoıǵan joq.
«Ǵylym jáne tehnologııalyq saıasat týraly» zań ǵylym salasynda eńbek etip júrgen ǵalymdardy qýantyp, bir serpiltip tastaǵany anyq. Ǵylymı dárejesi bar qyzmetkerlerdiń ǵylymı qyzmetin yntalandyrý úshin aı saıyn ústemeaqy belgileý, jetekshi ǵalymdarǵa shyǵarmashylyq demalys berý sekildi talaptar ǵylymı nátıjelerdiń sapaly maqalalar men monografııalar túrinde basylyp, bilim alýshylar men jas izdenýshilerdiń ǵylymǵa kelýine sebepshi bolary sózsiz. Sııasy keppegen «Ǵylym jáne tehnologııalyq saıasat týraly» zań ǵylymnyń damýyna muryndyq bolyp, elimizdiń básekege qabilettiligin arttyryp, ǵylymı-tehnıkalyq jáne ınnovasııalyq jetistik nátıjesiniń otandyq ónim túrine aýysyp, sany men sapasyn arttyrýǵa yqpal etedi dep senemiz.
Sana QABDRAHMANOVA, Q.Sátbaev atyndaǵy Qazaq ulttyq tehnıkalyq zertteý ýnıversıtetiniń qaýymdastyrylǵan professory, tehnıka ǵylymdarynyń kandıdaty