Batys Qazaqstan oblysyna qarasty Shyńǵyrlaý aýdanynda balalarǵa arnalǵan etno-lager uıymdastyryldy. Bul týraly Mádenıet jáne aqparat mınıstrligi habarlady, dep jazady Egemen.kz.
Jazǵy demalysta 7-14 jas aralyǵyndaǵy oqýshylar halqymyzdyń salt-dástúrleri týraly aqparat ala alady. 5 kúndik baǵdarlamada ulttyq sport oıyndary, atqa miný, sadaq atý, erkin kúres sabaqtary josparlanǵan.
«Bul balalardy turmysqa beıimdeýdiń tıimdi amaly deýge bolady. Mysaly, uldarǵa «bata berý» úıretiledi. Al sońǵy kúni er balalarǵa mal soıý, ony músheleý boıynsha master-klass ótkiziledi. Qyz balalar ulttyq taǵamdar daıyndaýdy úırenedi», delingen mınıstrlik habarlamasynda.
Mádenı demalys jobasy óskeleń urpaqqa qazaqtyń tól mádenıeti men ulttyq qundylyqtaryn sińirýdi kózdeıdi.