ǴARYShTYQ KELISIMDER QOLDAÝ TAPTY

Májilis Tóraǵasy Oral Muhamedjanovtyń jetekshiligimen ótken palatanyń sársenbi kúngi kezekti plenarlyq otyrysynda on jeti másele qaralsa, sonyń aldyńǵy jeteýi Keden odaǵynyń erejelerin aıqyndaıtyn zańdyq qujattar boldy. Baıandamany Qarjy mınıstri Bolat Jámishev jasady. Depýtattar biryńǵaı kedendik keńistiktiń 1 shildeden bastap kúshine enetinin eskerip, zań jobalaryn biraýyzdan maquldady. “Qazaqstan Respýblıkasynyń Úkimeti men Fransýz Respýblı­ka­synyń Úkimeti arasyndaǵy Jerdi qashyqtyqtan zondtaýdyń ǵarysh júıesi men ǵarysh appa­rattaryn qurastyrý-synaý keshenin qurý jáne paıdalaný sharttary týraly kelisimdi ratı­fıkasııalaý týraly” jáne “Qa­zaqstan Respýb­lıka­synyń Úki­meti men Reseı Federasııasynyń Úkimeti ara­syndaǵy “Baıqońyr” kesheninde bolý tártibi týraly kelisimdi ratıfıkasııalaý týra­ly” zań jobalary boıynsha baıan­­damany Ulttyq ǵarysh agent­tigi tór­aǵasynyń oryn­ba­sa­ry Meıirbek Moldabekov jasa­dy. Ol atalǵan ǵaryshtyq júıe áleýmettik-ekonomıkalyq damý máselelerin, qorǵanys pen qaýip­sizdik jáne jerdi paıdalaný, kartografııa, bıologııa, jyljy­maı­tyn múlik monıtorıngi jáne ózge de mindetterdi qamtıdy. Son­daı-aq kelisim otandyq ǵa­rysh apparattaryn óndirýge, jobalaýǵa, jınaýǵa jáne synaýǵa múmkindik beredi. Bul úshin ke­dendik jeńildikter qarastyryl­ǵan. Joba 2012 jylǵa deıin júzege asýy tıis. Vladımır Nehoroshevtiń suraǵyna oraı jaýabynda baıan­damashy joǵary tehnologııalyq ǵarysh apparattarynyń 60 paıyz­dyq jumysy jınaqtaýǵa arnalsa, qalǵan 40 paıyzy júıe­li jobalaý men matematıkalyq qamtamasyz etý baǵdarlamasyn ázirleýmen baılanysty ekendigin erekshe atap ótti. Osy turǵydan kelgende, qazaqstandyq ǵalymdar sońǵysyna qazirdiń ózinde daı­yn, deıdi Meıirbek Molda­bek­uly. Ekinshi kelisim boıynsha “Baıqońyr” ǵarysh aılaǵyndaǵy birqatar nysandardy paıdalaný merziminiń aıaqtalýyna nemese Reseı áskerı kontıngentiniń ke­týine baılanysty ol jalǵa berý quramynan shyǵarylǵan. Mine, osy jáne “Báıterek” zymyran ǵarysh keshenin qurýǵa qajet bir­qatar nysandar da Qazaqstan ta­rapyna qaıtarylyp otyr. Osy­ǵan oraı nysandarǵa barý úshin ruqsat berý erejelerine de óz­gerister engizilgeni belgili boldy. Qazaqstandyq nysandarǵa ruqsat “Qazǵarysh”, al reseılikter úshin “Roskosmos” pen “Baıqońyr” qa­lasy ákimdigi tarapynan beri­letin bolady. Sheteldikter ótinimi 45 kún ishinde sheshilse, qazaqstandyqtar úshin bul 5 kúnge deıin qysqartylypty. Depýtattar atalǵan zańdyq qujattardyń elimiz úshin ma­ńyz­dy ekendigin eskerip, maquldaýdy uıǵardy. Asqar TURAPBAIULY.