Senat depýtaty Aınur Arǵynbekova Semeı qalasyndaǵy medısınalyq jedel járdem aýrýhanasynyń dárigerler qaýymymen kezdesti. Mekemeniń ózekti máseleleri men muqtajyn talqylaý – kezdesýdiń basty maqsaty boldy. Munda aýrýhanaǵa kúrdeli jóndeý júrgizý qajettigi – kezek kúttirmeıtin másele.
Medısına qyzmetkerleri kezdesý barysynda aýrýhananyń ınjenerlik-kommýnıkasııalyq ınfraqurylymynyń jaramsyz jaǵdaıyna alańdaýshylyq bildirdi. Atap aıtqanda, jertóle sý astynda qalyp, ǵımarattyń irgetasyna orasan zor zaqym kelgen bolatyn. Sondaı-aq aýrýhana aýmaǵyn abattandyrý jumysynyń sapasyz jasalǵany men qyzmetkerlerdi kólikpen qamtamasyz etýdiń joqtyǵy týraly problemalar aıtyldy.
Aınur Arǵynbekova densaýlyq saqtaý isinde kóptegen problemalyq másele bar ekenin jáne olar shuǵyl sheshýdi talap etetinin atap ótti.
«Densaýlyq saqtaý salasynda kóptegen problemalyq másele bar, olardy dereý sheshý qajet. Bul máselelerdi baqylaýǵa alyp otyrmyn. Máseleni Senat pen oblys ákimdigi birlesip qolǵa alatyn bolady», dep atap ótti depýtat.
Senator medısınalyq personaldyń jumysyna qolaıly jaǵdaıdy qamtamasyz etý jáne pasıentterdi qaýipsiz emdeý maqsatynda aıtylǵan máselelerdi jedel sheshýge bar kúsh-jigerin arnaıtynyn atap ótti.