Qapshaǵaı sý qoımasynda ótken «Oceanman Kazakhstan-2024» baıraqty básekesine 17 elden 2 600-den asa sportshy kelip, ashyq sýda júzýden halyqaralyq jarys aıaqtaldy. Bıyl qatysýshylardyń rekordtyq sany tirkeldi.
Shartaraptyń sportshylary bas qosqan bul sporttyq jarystyń maqsaty – salamatty ómir saltyn nasıhattap, sýda júzýshilerdiń kásibı deńgeıin arttyrý, sondaı-aq sý sportyn damytý. Úshinshi jyl ótkizilip otyrǵan jarysqa qatysýshylardy qarsy alǵan Almaty oblysynyń ákimi Marat Sultanǵazıev «Oceanman» tek sport merekesi ǵana emes, óńirdiń týrıstik tartymdylyǵyn kórsetý múmkindigine ıe ekenin atap ótti.
«Sportty damytýǵa erekshe kóńil bólinip jatyr. Oblystyń jarty mıllıonǵa jýyq turǵynynyń 39,5 paıyzy sportpen aınalysady. Búgin osy is-sharaǵa kýá bolý úshin 3 myńnan asa adam jınaldy. Dál osyndaı aýqymdy oqıǵalar joǵary dárejeli sportshylardy tárbıeleıdi, sondaı-aq oblysta da, elde de sport pen týrızmdi damytý úshin qosymsha serpin beredi», dedi óńir basshysy.
Italııadan bastaý alyp, Qazaqstanǵa jetken «Oceanman» qurlyqtardy biriktiredi. Bul – 2015 jyly Italııa men Ispanııada bastalǵan halyqaralyq franchaızıng. Búginde jarys búkil álemde ótedi, kásipqoı, áýesqoı júzýshilerdi jınaıdy. Uıymdastyrýshylar qatysýshylardyń deńgeıine qaraı ártúrli qashyqtyqty qarastyrǵan. Jańadan bastaýshylar úshin 1 shaqyrym bolsa, tájirıbeli sportshylar úshin – 10 shaqyrym.
«Oceanman Kazakhstan» tirkelgen qatysýshylar sany boıynsha keıingi úsh jyldaǵy rekordty ornatty», dedi bas uıymdastyrýshy, «Oceanman Kazakhstan» franshızasynyń ıegeri Eraly Oralov.
Bıyl júzýge Reseı, Qyrǵyzstan, О́zbekstan, Eýropa, Azııa jáne Aýstralııany qosa alǵanda, álemniń 17 elinen 2 600-den asa júzýshi qatysty. Qatysýshylardyń jasy 7-den 70 jasqa deıingi aralyqty qamtydy.
«Sýda júzý jarysynda kásipqoı júzýshiler 5 pen 10 shaqyrymdyq jarys jolyna shyqsa, júzýdi jańa bastaǵandar 1 jáne 1,5 shaqyrymda ózara baq synasty. Al balalar bolsa 800 metr qashyqtyqta synǵa tústi. Sýda júzýge qyzyǵýshylar qatary jyldan-jylǵa ósip keledi. Jarystyń joǵary deńgeıde ótýine atsalysqan oblys ákimdigi men qoldaý bildirgen demeýshilerge alǵysymyz zor. Jarys jolynda júzden júırik shyqqan jeńimpazdar men júldegerler kúzde Dýbaıda ótetin álem birinshiligine joldama aldy», deıdi «Oceanman» franshızasynyń ıesi Fermın Egıdo.
Aıta keterligi, halyqaralyq sýda júzý jarysynyń óz máresine jetkenge deıin qatysýshylardyń qaýipsizdigine basa nazar aýdaryldy. Osy maqsatta 24 júzý quraly, 6 tótenshe jaǵdaı qaıyǵy men qutqarýshylar qyzmet sapynda turdy.
Almaty oblysy