Aqmola oblysynda qaıta jańartylyp jatqan Nura toptyq sý qubyrynyń 68,7 shaqyrym bóliginiń qurylysy aıaqtaldy, dep habarlaıdy Egemen.kz QR Sý resýrstary jáne ırrıgasııa mınıstrliginiń baspasóz qyzmetine silteme jasap.
Mınıstrliktiń habarlaýynsha, búginde jergilikti atqarýshy organdardyń ótinishi boıynsha Uzynkól, Býrevestnık, Poltavskoe jáne Egindikól aýyldaryn jańa sý torabyna qosý jumysy júrgizilip jatyr. Jaqyn arada bul jumystar aıaqtalady. Osyǵan deıin toptyq sý qubyryna Janteke jáne Toǵanas aýyldary qosylǵan edi.
Sonymen qatar odan keıin sý qubyrynyń Uzynkól aýylynan Egindikól aýylyna deıingi bóligin aıaqtap, qoldanysqa berý josparlanǵan.
Eske sala keteıik, osyǵan deıin Nura toptyq sý qubyrynyń bas qurylystarynan uzyndyǵy 36 shaqyrym bolatyn Uzynkól aýylyna deıingi ýchaskede sý berile bastaǵan edi.
«Jobalaý-smetalyq qujattamaǵa saı sý qubyrynyń negizgi bóligin tóseý jumystary aıaqtaldy. Nura toptyq sý qubyryn rekonstrýksııalaý erekshe baqylaýǵa alyndy. Sý sharýashylyǵy komıtetiniń mamandary únemi qurylys alańyna baryp, jumystardyń oryndalýyn qadaǵalaıdy. Bıyl 1,4 mln turǵyndy aýyz sýmen qamtý sapasyn jaqsartý úshin toptyq sý qubyrlaryn salý jáne rekonstrýksııalaý boıynsha 30 joba iske asyrylyp jatyr», dedi Sý resýrstary jáne ırrıgasııa mınıstrligi Sý sharýashylyǵy komıtetiniń tóraǵasy Arsen Jaqanbaev.