Elimizde shaǵyn bıznes ókilderin qoldaý maqsatynda úlken jobalardyń júzege asyp jatqany belgili. Kásipke ıkemi bar jastardyń ártúrli salany ıgerip, alǵa umtylǵany kóńilge senim uıalatady.
Semeı qalasynda keıingi jyldary «Camca.kz» kompanııasynyń ónimderine suranys artyp tur. 30 adam qyzmet etetin kásiporyn ulttyq taǵamdardy usynýmen birge arab, ózbek, uıǵyr halqynyń samsalaryn da satady. Jas kásipker Aıjan Botbaevanyń bul bıznesi pandemııa kezinde bastalǵan. Sol kezde júktiligi men bala kútimine baılanysty demalysta bolǵan Aıjan óz qolynan shyqqan taǵamdardy jaqyn-jýyq, kórshi-qolańǵa usynady.
Daıyndaǵan ónimderi birtindep dúken sórelerinen oryn tapty. Kásippen kásibı túrde aınalysýǵa kúıeýi qoldaý bildirgen.
«Men buǵan deıin О́skemen qalasyndaǵy Tabıǵı resýrstar basqarmasynda jumys istedim. Karantın kezinde ázirlegen taǵamdarymnan dám tatyp kórgen kórshimiz zor alǵysyn bildirdi. Qýanyshymdy jasyra almaı joldasymmen bólisken sátte, ol da maqtaý lebizin jetkizdi. Sóıtip, kún sanap kásip ashý ıdeıasyna bir taban jaqyndaı tústik», deıdi Aıjan Botbaeva.
Dáýlet ekeýi endi úılerinen tys jerde kásip júrgizýge kirisedi. Ár saǵat saıyn satyp alýshylardyń sany ósip, olardyń joǵary talaby men talǵamynan shyǵý úshin óndiris sapasyn árdaıym nazarda ustaıdy. Taǵamdar daıyndalatyn sehta sapanyń avtorlyq standarttary saqtalǵan. Sapasyn únemi jetildirip otyrýmen qatar obektıvti jaǵdaılarǵa baılanysty ózgertetinin de tilge tıek etti. Taǵam ázirlenetin reseptýrany ózgertýmen birge estetıkanyń da mańyzdy ekeni ras.
«Kúıeýim bıznesti qalaı durys júrgizý keregin únemi úırenedi. Progressıvti elementterdi engizýge qushtar. Mysaly, sehta bári japondyq «Kaıdzen» fılosofııasyna sáıkes uıymdastyrylǵan. Bul – bıznes-úderisterdi jaqsartýǵa, tıimdilikti arttyrýǵa jáne operasııalardy oryndaýǵa ketetin ýaqytty qysqartýǵa baǵyttalǵan basqarý ádisi. Qarapaıym tilmen aıtqanda, bári qatań túrde baqylaýǵa alynǵan», deıdi Aıjan Asqarqyzy.
Qazir «Camca.kz» kompanııasy óz klıentteriniń ótinishine oraı assortımentti keńeıtip úlgergen. Munda endi óńdelgen taǵamdar men daıyn taǵam túrleri usynylady. Dámi tili úıiretin et qosylǵan jáne tátti pırog, salat, ystyq ári býfet taǵamdary satyp alýshylar kóńilinen shyǵyp jatyr. О́tken jyldyń jeltoqsan aıynan bastap balalarǵa arnalǵan as máziri óz maqsatyna jetti deýge bolady. Brokkolı men taýyq etinen jasalǵan kotletter qazirdiń ózinde tıimdi baǵada halyq paıdasyna jarap jatyr.
Kásipkerge aldaǵy ýaqytta óz isin emin-erkin dóńgeletý men damytý úshin memlekettik baǵdarlama arqyly 5 mln teńge kóleminde grant bólinip otyr. Bıznesti qoldaý maqsatyndaǵy qarjyny ıgerýden bólek, jańa jumys oryndaryn ashyp, satylym aıasyn úlkeıtý baǵdary kózdelip otyrǵanyn aıtady kásipker.
Abaı oblysy