Ádilet mınıstrligi elimizdiń búkil aýmaǵynda «Sıfrlyq sot oryndaýshyny» iske qosty. Bul júıe azamattardyń 5 mıllıard teńgeden astam qarajatyn únemdeýge múmkindik bermek.
Mınıstrliktiń habarlaýynsha, mundaı múmkindik mınıstrliktiń bastamasymen jeńildetilgen óndiristiń jańa ınstıtýty aıasynda halyq ıgiligine usynylyp otyr. Memleket basshysy Qasym-Jomart Toqaevtyń tapsyrmasy negizinde azamattardyń aqshalaı mindettemelerin tómendetý jáne ádilet organdarynyń jumysyn odan ári sıfrlandyrý baǵytyndaǵy zańnamaǵa tıisti ózgerister engizildi.
«Buryn qaryzdy ýaqtyly ótemegen jaǵdaıda, azamattar jeke sot oryndaýshynyń qyzmeti úshin aıyppul somasyna qosymsha 25% qarajat tóleýge mindetti bolǵan. Endi azamattar osy shyǵyndardan jáne jeke sot oryndaýshyǵa barýdan bosatylady. Máselen, 20 AEK-ke deıingi somadaǵy ońaılatylǵan óndiriske azamattar «eGov mobile»-da is týraly jan-jaqty aqparaty bar 1414-ten SMS habarlamalar men push-habarlamalar alady.
Halyqqa yńǵaıly bolý úshin barlyq qamtamasyz etý sharasyn (tyıym salý) avtomatty túrde alyp tastaı otyryp, bereshekti onlaın tóleý qoljetimdi bolmaq. Osylaısha, adamı faktor tolyǵymen alynyp tastalady», delingen Ádilet mınıstrliginiń baspasóz qyzmeti taratqan aqparatta.
Sondaı-aq aldyn ala esepteýler boıynsha jeke sot oryndaýshylaryna qyzmet aqysynyń 25%-yn alyp tastaý esebinen jyl saıyn azamattardyń qarjylyq júktemesi shamamen 5,5 mlrd teńgege tómendeıdi degen boljam bar.
Osylaısha, sot oryndaýshylarymen baılanysýdyń, barlyq áreket onlaın rejiminde júrgiziledi, óndiristi toqtatý men qamaýǵa alýdy alyp tastaý úshin túbirtekter men basqa da rastaıtyn qujattardy usynýdyń qajeti joq.
Aıta ketetin jaıt, kúntizbelik 30 kún ishinde atqarýshylyq qujattyń (ońaılatylǵan is júrgizý boıynsha) talaptary oryndalmaǵan jaǵdaıda, is jeke sot oryndaýshysyna oryndaýǵa beriledi jáne odan keıingi atqarýshylyq áreketter komıssııany óndirip ala otyryp, jalpy tártippen júzege asyrylady.
Eske sala ketsek, bul joba bıyl 18 qańtardan bastap Taraz qalasynda synaqtan ótkizilgen edi. Azamattardyń aqshalaı mindettemelerin tómendetý, qaǵaz tasyǵyshtan tolyq bas tartý jáne atqarýshylyq is júrgizýdi oryndaý úderisinde adamı faktordy alyp tastaý túrinde oń nátıje kórsetti.