V Dúnıejúzilik kóshpeliler oıyndarynda báıge túrlerinen saıys 13 qyrkúıekte «Qazanat» ıppodromynda ótedi. 12 qyrkúıekte mandattyq komıssııa men tóreshiler alqasynyń otyrysy bolady. О́kilder men jattyqtyrýshylar da arnaıy jıynǵa qatysyp, báıge erejesin talqylaıdy.
Etnosport dodasyn ushqyr báıgege qatysýshylar bastaıdy. Aldymen 1 600 metrge, odan keıin 2 400 metr, 3 200 metr qashyqtyqqa júıtkıtin qylquıryqtardyń básekesi ótedi. Jorǵa jarysy 9 shaqyrymǵa ulassa, qunan báıgege qosylatyn júırikter 11 shaqyrymǵa, top báıgege túsetin tulparlar 18 shaqyrymǵa júıtkimek. Qalyń kórermen 25 shaqyrymdyq alaman báıgeni erekshe kútedi. Sebebi Qyrǵyzstannyń baǵyna bitken áıgili Qaraqyz tulpar Dúnıejúzilik kóshpeliler oıyndaryna qosylady. Bir jylda birneshe avtokólik, páter utqan júıriktiń baǵy da, baby da basym bolyp tur. Atseıis Izat Nurmatuly osy tulparyn úkilep qosyp, Astana tórindegi Dúnıejúzilik kóshpeliler oıyndarynda alaman báıgeniń aldynan kórinýden úmitti. Qyrǵyzstanda ótken aıtýly alaman báıgeniń bas júldesin oljalap júrgen júıriktiń baby da kelisip tur.
Elimizdiń atbegileri de jyldan asa merzim jaratyp, zar kúıinde ustap otyrǵan arǵymaqtaryn elordada ótetin dúnıejúzilik alamanǵa qosady. Kóshpeliler oıyndarynda kómbeden dara kórinedi dep senim artar arǵymaqtyń biri – Jumyrtuıaq.
Jetisý oblysy Eskeldi aýdany Jalǵyzaǵash aýylynyń 4-synyp oqýshysy Hamza Amangeldi byltyr osy júırigin taqymdap, alaman báıgeden birneshe ret júldeli boldy. Osy kúnde atseıis qaýym men báıge jankúıerleri arasynda Hamzanyń esimi Jumyrtuıaq tulparmen qatar atalady. Atbegi Marlan Bektenov bıylǵy kóktem men jaz aılarynda Jumyrtuıaq osyǵan deıin úsh báıgege qosylǵanyn aıtty.
«Kóktemde Taldyqorǵan qalasynda ótken Qazaqstan chempıonatynda alaman báıgede ekinshi oryn ıelendi. Shildeniń basynda Almaty oblysy Kegen aýdanyndaǵy áıgili Qarqara jaılaýynda ótken Qymyzmuryndyq aıasynda báıge túrlerinen «Jolan júırigi» saıysy ótti. Alaman báıgege 75 júırik qosyldy. Mine, osy tulparlardyń arasynan Jumyrtuıaq qara úzip, bás báıgege tigilgen sheteldik avtokólik buıyrdy. Odan keıin Qaraǵandy oblysynda ótken respýblıkalyq báıgede alamannyń bas júldesine Astana qalasynan páter tigildi. Sol dodada Jumyrtuıaǵymyz jeldeı esip, kermeni aldymen qıdy. Endigi meje – osy Dúnıejúzilik kóshpeliler oıyndary. Attardy bir alamanǵa qosqannan keıin ábden tynyqtyramyz. Jumyrtuıaq – Ýkraınadan satyp ákelgen Aıtuıaq degen aıǵyrdyń qulyny. О́zi dónennen bestige aıaq basty. Byltyr da mártebemizdi ósirdi. Bes ret alamanǵa qostyq: tórt márte birinshi keldi, bir ret ekinshi oryn buıyrdy. Kókshetaý qalasynyń birinshiliginde top jaryp, 5 mln teńge oljaladyq. Odan keıin qazaq ádebıetinde detektıv janrynyń keń qanat jaıýyna orasan úles qosqan qalamger Kemel Toqaevtyń týǵanyna 100 jyl tolýyna oraı ótkizilgen alaman báıgede «Toıota Land Krýzer» kóligin taqymdadyq. Jumyrtuıaq úshin byltyrǵy jyljabar sońǵy alaman Qyzylorda oblysynda ótti. Sol alamanda da «Toıota haılander» kóligine ıe boldyq. Semeı qalasyndaǵy alaman báıgede top jaryp, «Mitsubishi L300» jol talǵamaıtyn temir tulpar buıyrdy. Abaı oblysy Aqsýat aýdany uıymdastyrǵan alamanda ǵana kómbege ekinshi bolyp jetip, 300 myń teńge aldyq. Munyń barlyǵy – ujymdyq eńbektiń jemisi. Qoltýma júırigimizdi qulyn kezinen tap basyp tanyp, qoltyǵyn sóge, baýyryn jaza kósiletin tulparǵa aınalǵanǵa deıingi aralyqta qanshama eńbek jatyr. Ony tek atbegiler ǵana tereń túısinedi», deıdi bilikti maman.
Alaman báıgede basty orynnan úmitti arǵymaqtyń biri – Soflor Lend esimdi júırik. 4 jasar taza qandy aǵylshyn tuqymy bıyl jankúıerlerdi orasan jeńisimen tánti etti. Ahmet Ahmoldın baptaıtyn sáıgúlikti Ámir Amantaıuly minedi. Pavlodar qalasynda ótken respýblıkalyq alaman báıgede attar 25 shaqyrymǵa shapty. Soflor Lend dara kelip ıesin qýatty. Odan keıin Dúnıejúzilik kóshpeliler oıyndaryna irikteýdiń 1-kezeńinde de bul arǵymaq aldyna qara túsirgen joq. Qanysh Sátbaevtyń 125 jyldyq mereıtoıyna oraı uıymdastyrylǵan alaman báıgeniń bas júldesi osy sáıgúlikke buıyrdy.
Dúnıejúzilik kóshpeliler oıyndaryna Jetisý oblysy Kerbulaq aýdany Jolaman aýlynan Vıza esimdi júırik qatysady. Taı kezinde, qunan shyqqanynda da onnan asa báıgeniń aldynan kórinip, ıesin qýantqan tulpar alaman dodasyna bıyl ǵana qosylyp, talaıdyń tańdaıyn qaqtyrdy. Dáýlet Asylov baptaıtyn júırikti elorda tórindegi dodada Álıhan Baqythanuly tizgindeıdi. Bes jasar arǵymaq ta – taza qandy aǵylshyn tuqymy. Etnosport dodasyna qatysatyn attardy irikteý birneshe kezeń boıynsha ótti. Ekinshi irikteý synynda alaman báıgede Vıza tulpar top jardy. «Uly alaman oıyndary» báıgesinde de Vızadan ozar tulpar shyqqan joq.