Jas izdenýshiniń tabysy

Búginde jas izdenýshi geogra­fııalyq aq­pa­rat­tyq júıeleri arqyly jasaǵan taktıldi ma­ketin arnaıy synaqtan ótkizip, mamandar tarapynan joǵary baǵasyn alǵan. Jalpy, kórý qabileti tómen adamdar arnaıy bilim alý úshin Braıl qarpin qol­da­nady. Munda alfavıt núk­teler arqyly ornalasqan. Izdenimpaz stýdent dıplomdyq jumysyna osy Braıl qarpin negizge alǵan. Áripterdi belgileý úshin alty núkteni qoldanyp, bul núktelerdi eki qatarǵa or­nalastyrǵan. Núk­teler qaǵaz betine birneshe mıllımetrge shyǵyp turady. Osy núkteni sıpalap, áripti tanıdy.

Amerıkalyq «Esri» kompa­nııasy shyǵarǵan «ArcGis» baǵ­darlamasynyń ereksheligi – kartografııa baǵytyndaǵy kartalardy sıfrlandyrady. Onda aqparatty eki tásilmen kórsetedi: rastrlyq jáne vektorlyq derektermen. Daryndy jas óz jumysynda atalǵan eki tásildi biriktirgen. Aldymen, taktıldik kartalardy jasaý úshin kartalar týraly qysqasha derek berip, ony qurastyrýdyń ereksheligi men talaptaryn tanystyrǵan. Nátıjesinde, kórý qabileti tómen azamattarǵa arnalǵan kartalarda birneshe erekshelikti anyq kórsetken. Negizgi jumys «ArcGis-te» oryndaldy. Taktıldik kartany ázirleýge Almaty qalasyndaǵy tórt kósheniń qıylysy tańdap alyndy. Nysandar qataryna Q.Sátbaev atyndaǵy QazUTZÝ korpýstary, «Forým» saýda ortalyǵy, birneshe jataqhana men fýtbol alańy jáne me­dısınalyq ortalyǵy kirdi. «Sketchup» baǵdarlamasy bo­ıynsha 3D-model jasaldy. Bul model osy synaq maketin da­ıyndaý úshin ázirlengen. Birneshe materıaldan turatyn maket da­ıyndaldy. Maket kórý qabileti tómen jandarǵa óte yńǵaıly. Makettiń negizgi ereksheligi – onyń tanymdyq jumysqa arnalyp otyrǵany. Onda QazUTZÝ korpýsy men Q.Sátbaev, S.Seıfýllın, A. Baıtursynuly jáne Tımırıazev kósheleriniń qıylysynda ornalasqan basqa da nysandar kórsetilip, ár­bir nysannyń ataýy Braıl qar­pimen belgilengen.

Qazir jas izdenýshi dıp­lomdyq jumysyn Inklıýzıvti bilim berýdi qoldaý jáne súıe­meldeý ortalyǵyna tap­syrǵan. Bolashaqta ony atal­ǵan ýnıversıtettiń negizgi kor­pýsynyń birine ornatý kózdelip otyr.