Otandastarymyzdyń 57,8%-y 6 qazan kúni ótetin referendýmǵa qatysýdy josparlap otyr. 59,3%-y AES qurylysyna qoldaý bildirgen, dep habarlaıdy Egemen.kz.
Qoǵamdyq saıasat ınstıtýty 6 qazanda ótetin atom elektr stansııasyn salý jóninde referendýmǵa otandastarymyzdyń kózqarasyn zertteýge baǵyttalǵan ekspress-saýalnama júrgizdi. Zertteýge Qazaqstannyń ártúrli aımaqtarynan 2000-nan astam turǵyn qatysty, olardyń arasynda jastar, zeınetkerler, kópbalaly otbasylar jáne basqa da áleýmettik top ókilderi bar.
Instıtýt dırektory Madına Nurǵalıevanyń aıtýynsha, bıyl 6 qazanda ótetin respýblıkalyq referendým týraly jalpy alǵanda respondentterdiń 74,6%-y habardar. Saýalnamaǵa qatysýshylardyń 57,8%-y referendýmǵa qatysýdy josparlap otyr, al 59,3%-y Qazaqstanda AES salýdy qoldaıdy. Degenmen, el turǵyndarynyń AES qurylysy týraly pikirleri endi ǵana qalyptasyp jatqanyn atap ótken jón.
«Bizdiń zertteýimiz halyqtyń basym bóliginiń aldaǵy daýys berý týraly habardar ekenin jáne referendýmǵa belsendi qatysýdy josparlap otyrǵanyn kórsetti. Azamattardyń joǵary deńgeıde habardar bolýy jáne qatysýy atom elektr stansııasyn salý máselesi úlken qyzyǵýshylyq pen qyzý talqy týdyryp jatqanyn bildiredi. Bul derekter sheshim qabyldaýda mańyzdy ról atqarady, óıtkeni referendýmnyń mindeti – barynsha ashyqtyqty qamtamasyz etý jáne eldiń árbir turǵynynyń pikirin eskerý», dep atap ótti Madına Nurǵalıeva.
Saýalnama barysynda «face-to-face» ádisi qoldanyldy, Qoǵamdyq saıasat ınstıtýtynyń bas sarapshysy Medet О́mirzaqovtyń aıtýynsha, bul derekterdi jınaýdyń eń dál ádisteriniń biri sanalady.
«Derekterdi jınaý E-analıtıka júıesi negizinde qaǵazsyz túrde júrgizildi, saýalnama prosesi avtomatty túrde tirkelip otyrdy. Bul ádis respondentpen jeke betpe-bet suhbatty bildiredi, ol bizge onyń jaýaptarymen qatar reaksııasyn, suhbattyń ótkizilý uzaqtyǵyn jáne GPS-koordınattaryn tirkeýge múmkindik beredi. Bul derekterdiń sapasyn arttyryp, saýalnamanyń dáldigin baqylaýǵa kómektesedi. Biz sondaı-aq suhbat ýaqytyn baqylaý jáne qosymsha suraqtaryn qoıý sııaqty ártúrli tekserý ádisterin qoldanamyz», dedi ol.
Qoǵamdyq saıasat ınstıtýtynyń sarapshylary sóz sońynda mundaı áleýmettik zertteýler el azamattarynyń jaǵdaıdy jaqsyraq túsinip, negizdelgen sheshimder qabyldaýyna kómektesetinin atap ótti.
Saýalnama QR zańnamasynyń normalaryn saqtaı otyryp júrgizilgen.