Ár otbasy – berekeli qoǵamnyń tiregi. Sonyń aıǵaǵy retinde elimizde jyl saıyn «Mereıli otbasy» ulttyq baıqaýy uıymdastyrylyp keledi. Keshe Astana tórinde Otbasy kúni qurmetine dástúrli baıqaýdyń jeńimpazdary arnaıy marapattaldy. Saltanatqa memlekettik laýazymdy tulǵalar, qoǵam qaıratkerleri, túrli uıymdardyń basshylary jáne elorda jurtshylyǵy qatysty.
Otbasy – shaǵyn memleket. Sol shaǵyn memlekettiń bereke-birligin saqtap, yntymaǵyn jarastyratyn ata-ana bolsa, kózdiń qarashyǵyndaı balalar – adaldyqty tý etken januıanyń jalǵasy, izbasary, eldiń keleshegi. Muny zaıyrly, quqyqtyq memlekette ómir súrip jatqan árbir otbasy jaqsy biledi. «Mereıli otbasy» ulttyq baıqaýyna úmitker bolǵan aýdan, oblys, qaladaǵy otbasylardyń qaı-qaısysy da – urpaq jalǵasynyń, ult tárbıesiniń úzdik úlgisin kórsetip, kóptiń qoshemetine bólengen aqadal jandar. Osy kúnge deıin baıqaýǵa eldiń barlyq óńirinen 20 myńnan asa otbasy qatysypty. Onyń ishinde san túrli salada tolymdy eńbek etken abzal jandar, eńbek adamdary jeterlik. Bıyl baıqaýǵa qatysýǵa nıet bildirgen úmitkerlerden aýdandyq (qalalyq) komıssııalarǵa 3 369 ótinim túsipti. О́tinimderdiń sany boıynsha Qaraǵandy oblysy (534 ótinim) – kósh basynda. Baıqaýǵa qatysqan otbasylar arasynda 1 508 kópbalaly, 700 jas otbasy bar eken.
«Mereıli otbasy» ulttyq baıqaýynyń laýreatyn marapattaý rásiminde Parlament Senatynyń tóraǵasy Máýlen Áshimbaev jeńimpazdarǵa sáttilik tilep, Memleket basshysynyń quttyqtaý hatyn oqyp berdi.
«Mereıli otbasy» baıqaýy – ulttyq qundylyqtardy jańǵyrtýǵa jol ashatyn, ózindik dástúri bar biregeı joba. Halqymyzdyń asyl qasıetterin óskeleń urpaqtyń boıyna sińirý – bárimizge ortaq mindet. Osy oraıda ár otbasy aıryqsha ról atqarady. Elimizde adal eńbegimen kópke úlgi bolyp júrgen ónegeli áýletter az emes. Búgingi saltanatty kesh – sonyń aıqyn dáleli. Bul baıqaýdaǵy árbir otbasynyń jeńisin birligi jarasqan jurtymyzdyń mereıli jetistigi dep baǵalaýǵa bolady», – delingen Prezıdenttiń quttyqtaý hatynda.
Senat tóraǵasy «Mereıli otbasy» baıqaýynyń birneshe laýreattaryn marapattap, úlgili januıalarǵa alǵys aıtty.
– Otbasy kúni – kóp merekeniń biri ǵana emes. Ol – ultymyzdy uıystyratyn, ár shańyraqqa shattyq syılaıtyn mańyzdy meıram. Barshańyzdy osy ataýly merekemen quttyqtaımyn. Búgin elimizdiń barlyq óńirinen úzdik otbasylar jıylyp otyr. Sizderdiń ónegeli joldaryńyz kópshilikke úlgi, ásirese, óskeleń urpaq úshin aınymas baǵdar dep aıtsaq artyq bolmaıdy. Dana halqymyzda «Otan – otbasynan bastalady» degen sóz bar. Rasymen, ár otbasy – eldiktiń tiregi jáne bereke-birliktiń bastaýy. Sondyqtan Memleket basshysy Qasym-Jomart Toqaevtyń otbasy áleýetin kóterýge, ana men balany qorǵaýǵa, qoǵamda durys qundylyqtardy dáripteýge aıryqsha mán berip keledi. Memleket basshysy jýyrda Joldaýda osy máselege taǵy da basa nazar aýdardy. Prezıdent onda azamattardyń ál-aýqatyn arttyrýǵa arnalǵan kezekti áleýmettik bastamalar keshenin jarııalady. Munyń barlyǵy elimizdegi ár otbasynyń ómirine oń yqpal etetini anyq, – dedi M.Áshimbaev.
Osydan soń Mádenıet jáne aqparat mınıstri, Prezıdent janyndaǵy Áıelder isteri jáne otbasylyq-demografııalyq saıasat jónindegi Ulttyq komıssııanyń tóraǵasy Aıda Balaeva jeńimpazdarǵa jyly lebizin jetkizdi.
– Elimizdegi árbir otbasy – qoǵamnyń, memlekettiń tiregi. Úıdiń úlkenderi, sizder, óskeleń urpaqtyń boıyna adamgershilik, izgi qasıetterdi sińirip, ulttyq qundylyqtar men otbasylyq qundylyqtardy dáriptep júrsizder. Osylaısha, eldiń damýyna, gúldenýine úles qosyp kelesizder. Eńbekterińiz jana bersin. Otbasylaryńyzdan yrys-yntymaq ketpesin, shańyraqtaryńyz shattyq pen qýanyshqa toly bolsyn, – dedi A.Balaeva.
Elimizdiń ár óńirinen kelgen 20 úzdik otbasynyń ishinde Atyraýdan kelgen Syralıevter áýleti bar. Birligi jarasqan januıa músheleri shyǵarmashylyqpen jáne volonterlikpen aınalysady. Otaǵasy Tóremurat Syralıev kúzetshi bolyp jumys isteıdi. Zaıyby – Saǵııa Kempirbaeva balalar mýzyka mektebiniń dırektory. Tóremurat 20 jyldan asa geofızıkalyq mekemede eńbek etti. Saǵııa 35 jyl boıy Janbaı aýylynda balalar mýzyka mektebiniń muǵalimi jáne dırektory bolyp jumys isteıdi. Erli-zaıyptylar 33 jyl boıy birge ómir súredi. Úsh qyz ben ul tárbıelep otyr. Syralıevter otbasynyń azamattyq isteri kóp. Olar aýdandyq «JasSTAR» eriktiler tobyn qurýǵa yqpal etken. Bıyl sý tasqyny kezinde otbasynyń barlyq múshesi shette qalmaı, adamdardy qutqarǵan, sý basqan aımaqtarǵa azyq-túlik tasyp, bekinis bógetterin salǵan.
Jeńimpazdardyń arasynda Almaty qalasynan kelgen Qapyshevtar otbasynyń shoqtyǵy bıik. Otaǵasy Murat Qapyshev men jary Menzıpa Tóleýova – zeınetkerler. Búginde Qapyshevtar áýletiniń úshinshi býyny temirjol salasynda eńbek etedi. Shańyraqtaǵy temirjolshylardyń jalpy eńbek ótilin qossa, 826 jyldy quraıdy eken. Yntymaǵy jarasqan úlken shańyraqtyń 26 múshesi mamandyǵyn temirjol salasymen baılanystyrǵan. Murat Qapyshevtiń ózi ákesiniń eńbek jolyn jalǵastyrǵan. Temirjolshylar otbasynda dúnıege kelgen jubaıymen birge ol da temirjol salasynda 40 jyl jumys istegen.
Úzdik dep tanylǵan otbasylardyń arasynda agroónerkásiptik kesheniniń eńbekkerleri Qyzylorda oblysyndaǵy Bektaevtar otbasy bar. 89 jastaǵy otaǵasy Tólemis Bektaev pen 87 jastaǵy Sánimqul Áshirbekova – eńbek ardagerleri. Tólemis ata – Jalaǵash aýdanynyń qurmetti azamaty, 30 jyldan asa mehanızator bolyp istegen. Al Sánimqul áje – «Altyn alqa» ıegeri. «Batyr ana» ataǵyna ıe boldy, aýyl sharýashylyǵyndaǵy úzdik jetistikteri úshin «Halyqtar dostyǵy» ordenimen marapattalǵan. Kúrish ósirýshi 1982-1985 jyldary Qyzylorda oblystyq Halyq depýtattary keńesiniń depýtaty bolǵan. Búginde otbasynda 11 bala, 43 nemere, 66 shóbere jáne eki shópshek tárbıelep otyrǵan jaıy bar.
«Mereıli otbasy» baıqaýyna qatysqan úmitkerlerdiń arasynda 474 muǵalimder áýleti, 456 eńbek otbasy, 390 kópurpaqty otbasy, 327 shyǵarmashylyq otbasy, 293 eńbek áýleti, 268 kásipker, 225 sportqa den qoıǵan otbasy, 63 mesenat, 48 erikti, 21 asyrap alýshy (patronat) otbasy bolypty. Ol januıalardyń árbir múshesi – qala, aýdan, aýyldaǵy aǵaıynǵa eńbegimen, azamattyq isimin úlgi-ónege kórsetip, otbasy qundylyǵyn nasıhattap júrgen jandar.