Qazaqstan oqýshylary halyqaralyq olımpıadalardaǵy jeńisi úshin 5,5 mıllıon teńgeden syıaqy alady. Bul týraly Oqý-aǵartý mınıstrliginen málim boldy, dep habarlaıdy Egemen.kz.
Álemdik TOP-7 bedeldi olımpıadalarda júldeli oryn alǵan 26 Qazaqstan oqýshysy qarjylaı syıaqy alady. Syıaqynyń jalpy somasy 77,5 mıllıon teńgeden asady. Aıta ketsek, memleket tarapynan osyndaı birjolǵy syıaqy Prezıdent tapsyrmasymen 2022 jyly taǵaıyndalǵan. 2023-2024 oqý jylynda ulttyq qurama eń bedeldi álemdik pándik olımpıadalarda 2 altyn, 12 kúmis, 12 qola medal jáne bir dıplom ıelengen eken.
Altyn medal jeńip alǵan oqýshy 1500 aılyq eseptik kórsetkish (AEK) mólsherinde, kúmis medal úshin – 1000 AEK, qola medalǵa – 500 AEK mólsherinde aqshalaı syıaqy alady. Al altyn medal ıegerin daıyndaǵan pedagogke – bazalyq laýazymdyq aılyqaqy 26,5 eselengen mólsherinde; kúmis medal ıegerin daıyndaǵan pedagogke – bazalyq laýazymdyq aılyqaqy 17,5 eselengen mólsherinde; qola medal ıegerin daıyndaǵan pedagogke – bazalyq laýazymdyq aılyqaqy 8,5 eselengen mólsherinde beriledi. Sonymen qatar atalǵan jeńimpazdarǵa elimizdegi JOO-nyń kez-kelgenine oqýǵa túsýge bilim granty beriletini málim. Esterińizge salaıyq, ótken jyly 23 oqýshy 65,6 mln teńge, 20 pedagog jalpy somasy 71,4 mln teńge birjolǵy syıaqy alǵan. Jalpy 12 iri halyqaralyq jarysqa qatysqan Qazaqstannyń 1218 oqýshysynyń 603-i medal ıegeri atanǵan, ıaǵnı, árbir ekinshi qatysýshy júldeli orynǵa ıe bolǵan.