Álem elderi atom energetıkasyna bet buryp jatyr. Kórshi О́zbekstan da bir sheshimge kelip, reseılik tehnologııamen atom elektr stansasyn salatyn boldy. Sebebi qajetti energııasynyń 80 paıyzdan astamyn gazdan óndirip otyrǵan kórshi el gaz tapshylyǵyna urynǵan soń, eń senimdi ári qaýipsiz energııa kózi retinde AES-ti tańdady.
Osydan eki jyl buryn kógildir otynnyń túbi kórine bastaǵan О́zbekstan qazir Reseıden gaz ımporttap, ony jaǵyp, energııaǵa aınaldyryp otyr. Baǵa boljaýsyz qymbattaı beretin sekildi. О́zinde ájeptáýir ýran qory bar el AES salyp qamdanbasa, aldaǵy 25 jylda energııaǵa degen qajettiligi 2 ese artatyn kórinedi. Olar sol muqtajdyqty boldyrmaý úshin atom energııasyn ıgerýge kirispek.
Jaqynda Erevanda ótken dúnıejúzilik armıandar sammıti barysynda Armenııa Premer-mınıstri Nıkol Pashınıan da atom elektr stansasy boıynsha strategııalyq sheshim qabyldanǵanyn jarııalady. Onyń aıtýynsha, jańa AES qurylysy eldiń energetıka salasyndaǵy mańyzdy jobalardyń biri bolady.
Armenııa bıligi modýldik stansa salýdy qarastyryp otyr. Qazir álemde jumys istep turǵan modýldik atom elektr stansasy joq. Degenmen aıaqtalýdyń ártúrli kezeńinde turǵan birneshe joba bar. Bul salada AQSh úlken jetistikterge ıe. Sondaı-aq bul baǵyttaǵy jumystardy Fransııa, al sońǵy ýaqytta Reseı men Ońtústik Koreıa da ilgerilete bastady.
Bıyl 1 tamyzda Armenııa Úkimetiniń sheshimimen jańa atom elektr stansasynyń qurylysy úshin jeke kásiporyn quryldy. Jobanyń negizdemesin daıyndap, el Úkimetiniń maquldaýyn alǵan kompanııa halyqaralyq seriktestermen kelissóz júrgizip, jańa AES qurylysyn daıyndaý jáne qarjylandyrýǵa qatysty uıymdastyrýshylyq máselelerdi sheshýi kerek.