Elorda tórinde ótip jatqan Astana Media Week-2024 aptalyǵynyń ekinshi kúninde «Medıa mamandardy daıarlaý: ne kútemiz/ne alamyz» atty sessııa ótti, dep habarlaıdy Egemen.kz.
Atalǵan sessııany MSc in Communications Northwestern University kommýnıkasııa boıynsha mamany, ABCommunications Kazakhstan agenttiginiń dırektory Bahyt Amanjolqyzy ashty.
Sessııa barysynda halyqaralyq jýrnalıstıka mektepteriniń dırektorlary, elimizdiń úzdik joǵary oqý oryndarynyń dekandary men salanyń tájirıbeli ókilderi zamanaýı jýrnalıstıka qandaı mamandarǵa zárý ekenin túsindirdi.
Alǵash bolyp sóz sóılegen «Qazcontent» AQ Basqarma Tóraǵasy Aına Zadabek ózi basshylyq etetin kompanııada 7 aqparattyq resýrs birigip jumys istep jatqanyn tilge tıek etti.
«Biz ózimizdiń sapymyzǵa maman qosý aldynda jas jýrnalısterdi irikteýden ótkizemiz. Olardyń jan-jaqtylyǵyna, saýatyna, bilim deńgeıine, adamı qundylyqtaryna mindetti túrde nazar aýdaramyz.
Búginde shynymen de jaqsy maman tabý óte qıyn. Sebebi olardyń tárbıesi men bilimi tek bir adamnyń qolynda ǵana emes. Jas mamandar mektepten bastap joǵary oqý ornynda daıarlanady. Ol jerdegi ustazdar men professorlardyń biliktiligi de maqtanarlyq deńgeıde bolý qajet. Demek, barlyǵy bir birimen baılanysty ekenin ańǵaramyz. Demek, sapaly kontent usynatyn jýrnalısterdi daıarlaý isinde jańashyldyq pen halyqaralyq tájirıbe kerek», dedi sessııa spıkeri.
Al MNU ýnıversıteti halyqaralyq jýrnalıstıka mektebiniń dekany Aıgúl Jamalova jas mamandarǵa zamanaýı bilim berý qaǵıdalaryna birshama ózgeris engizilgenin atap ótti. Onyń aıtýynsha, elimizdiń eń úzdik zań ýnıversıtetinde halyqaralyq jýrnalıstıka mektebi de ashylyp, bilim salasyndaǵy tıimdi trendterdi usynyp otyr.
«Bizdiń oqý ordamyzda, ásirese ýnıversıtettiń jýrnalıstıka mektebinde bilim baǵdarlamasy túbegeıli ózgerip jatyr. Bizdiń professorlarymyz qazirgi jýrnalıstıka naryǵyndaǵy kadrlar daıyndaýdyń jańa trendterin eskerip, bolashaq mamandardyń bilimin tıimdi ádistermen jetildiredi.
Jalpy, mamandardy daıarlaý isinde túlekterdi irikteý kezeńine erekshe nazar aýdarý qajet dep esepteımin. Sebebi jas túlekterdiń kópshiligi UBT tapsyrý kezinde barlyq pánderdi tapsyrmaı, shyǵarmashylyq emtıhannan ótý arqyly grantqa ońaı qol jetkizgisi keletini jasyryn emes. Sondyqtan túlekterdi durys iriktep alý qajet. Odan bólek, ýnıversıtetterde teorııalyq sabaqtardan bas tartyp, praktıkalyq sabaqtarǵa kóp kóńil bólgen jón.
Máselen, men dekan retinde jas mamannyń boıynda 5 negizgi qasıet qalyptasqanyn qalaımyn, olar: biregeılik, medıa qaýymdastyqqa sińý, salalyq jýrnalıstıkaǵa beıimdelý, saraptama júrgizý jáne ekstraordınarlyqqa umtylý. О́zimizdiń stýdentterimizge de bul týraly únemi aıtyp júremiz», dedi Aıgúl Jamalova.
Odan bólek, sessııa barysynda fılosofııa ǵylymdarynyń kandıdaty, dosent ári Internews medıa saýattylyq jónindegi burynǵy keńesshisi Gúlnar Asanbaeva jasandy ıntellekttegi saýattylyq taqyrybyn qozǵady. Onyń aıtýynsha, jýrnalıster zaman talabyna saı jasandy ıntellekt usynatyn múmkindikterdi keńinen paıdalaný kerek.
Sondaı-aq sessııada ardager jýrnalıst Qaınar Oljaı, «Halyqaralyq baǵdarlamalar ortalyǵy» AQ Basqarma Tóraǵasy Álııa Ospanova, «Medıa damytý qory» KQ Bas dırektorynyń orynbasary Ásel Serikbaeva tájirıbelerin bólisip, ótkir pikirlerin bildirdi.