Premer-mınıstrdiń orynbasary Serik Jumanǵarın Qostanaı oblysyna jumys sapary barysynda aýylsharýashylyq nysandarynda bolyp, óńirde iske asyrylyp jatqan birqatar mańyzdy jobamen tanysty. Astyqty aımaqta aýylsharýashylyq ónimderin tereń óńdeýge baǵyttalǵan agroónerkásiptik jobalar belsendi damyp keledi. Jańa óndiris oryndary óńirdiń agrarlyq sektordaǵy pozısııasyn nyǵaıtyp, jańa jumys oryndarynyń kóptep ashylýyna sep bolyp otyr.
Vıse-premer «Úlken joba» boıynsha 2,5% jyldyq jeńildikpen nesıe alǵan jańa taýarly sút fermalarynyń qurylysymen tanysty. Máselen, «Vostok-1» JShS 1,2 myń mal basyna arnalǵan jobany aıaqtap jatyr. Atalǵan seriktestik quramynda aýylsharýashylyq daqyldaryn ósirýmen, tuqym seleksııasymen, asyl tuqymdy mal sharýashylyǵymen aınalysatyn óndirister bar. Oblys ákimi Qumar Aqsaqalov bul Qostanaı oblysynda «Úlken joba» boıynsha salynatyn alǵashqy zamanaýı ferma ekenin atap ótti. Atalǵan joba aıasynda óńirde alty TSF salynyp jatqanyn aıta ketý kerek. Olardyń úsheýi bıyl, al úsheýi kelesi jyly paıdalanýǵa beriledi. Jalpy, oblys boıynsha 2023 jyly 202 myń tonna sút óndirilip, onyń 172 myń tonnasy nemese 85%-y qaıta óńdelgen. Al bıylǵy 8 aı ishinde 165 myń tonna sút óndirilip, 140 myń tonna (84%) óńdelgen.
Vıse-premer jumysymen tanysqan «S-Agro-Borovskoe» JShS byltyr Kamenskýralsk kentiniń mańynda bıe sútin sýblımasııalaý zaýytyn iske qosty. Bul – «Local food» brendimen qurǵaq saýmal shyǵaratyn «Zollmann» nemis kompanııasymen birlesken kásiporyn. Nemis sýblımasııa tehnologııasy jańa saýylǵan bıe sútin -72°C temperatýraǵa deıin qatyrý arqyly onyń barlyq paıdaly qasıetterin saqtaýǵa múmkindik beredi. Kásiporynnyń qýaty táýligine 120 kg qurǵaq sút shyǵarýǵa jetedi. 2024 jyldyń qańtar-tamyz aılarynda «S-Agro-Borovskoe» 5 tonna qurǵaq sút óndirilip, ónim Astana jáne Almaty bazarlaryna jáne dárihana jelilerine jiberilgen. Kásiporyn basshysy Amangeldi Sarbasovtyń aıtýynsha, bıyl saýmal negizindegi kosmetıka óndirisine arnalǵan jabdyqty (qolǵa, betke arnalǵan krem, sabyn, sýsabyndar jáne t.b.) ornatý josparlanyp otyr. Kásiporynnyń nemis seriktesi «Zollmann» bul kosmetıkany Eýropada shyǵarady, ol úlken suranysqa ıe, biraq Germanııada óndiristi keńeıtýge múmkindik joq. S.Jumanǵarın «S-Agro-Borovskoe» JShS ıesine atalǵan jobany keńeıtýdi usyndy. Eksportqa jylqy etin ótkizý naryǵy kenjelep turǵany belgili. Alaıda qurǵaq bıe súti negizinde ónim óndirý elimizde jylqy sharýashylyǵyn odan ári damytýǵa jol ashady. Vıse-premer Saýda jáne ıntegrasııa mınıstrligine jańa ónimdi Qytaı naryǵyna shyǵarýǵa járdemdesýdi tapsyrdy.
Meńdiqara aýdanynyń egis alqabynda vıse-premer Serik Jumanǵarın Qostanaı oblysynyń fermerlerimen kezdesti.
«Biz fermerlerdi qoldaý kólemin birtindep arttyryp jatyrmyz. Atap aıtqanda, kóktemgi-kúzgi dala jumystaryna jeńildigi bar qarjylandyrý kólemin 700 mlrd teńgege deıin ulǵaıtamyz, onyń shamamen 40%-y «Damý» qory arqyly kepildendiriledi. Aýyl sharýashylyǵy tehnıkasyn lızıngke kredıtteý kólemi 100 mlrd teńgeden 200 mlrd teńgege deıin ósedi. Nátıjesinde, jyl saıynǵy jumystardy qamtamasyz etý úshin fermerlerdi qoldaý somasy 900 mlrd teńgege deıin ulǵaıady. Bıyl biz 2025 jylǵy kóktemgi egis jumystaryn qarjylandyrýdy bastaımyz», dedi S.Jumanǵarın fermerlerge.
Vıse-premer qyzmetimen tanysqan taǵy bir nysan qostanaılyq jylqy tuqymyn ósirýmen aınalysatyn «Qazaq tulpary» JShS boldy. Qazaqy jylqy tuqymyn saqtap, nasıhattaýdyń mańyzyn nazarǵa ala otyryp, vıse-premer Aýyl sharýashylyǵy mınıstrligine elimizde qurylyp jatqan Jylqy sharýashylyǵy ınstıtýtynyń bazasynda jeke qarajat esebinen jylqy zaýytyn jańǵyrtý baǵdarlamasyn daıyndaýdy tapsyrdy.
Qostanaı oblysy