Astana qalasynda satyp alýshylardyń ótinishi negizinde saýda salasyndaǵy 14 kásipker saýda qyzmetin retteý týraly zańnamany buzǵany úshin ákimshilik jaýapkershilikke tartyldy. Bul týraly elordanyń Kommýnıkasııalar qyzmetinde ótken brıfıngte qalalyq Saýda jáne tutynýshylardyń quqyqtaryn qorǵaý departamentiniń basshysy Nurǵalı Egemberdıev málimdedi.
Atalǵan kásipkerlerge salynǵan aıyppuldyń jalpy somasy 343 400 teńgeni quraǵan. Olar Ákimshilik quqyqbuzýshylyq týraly kodekstiń 193-babynyń 4-bóligi negizinde jaýapqa tartylǵan.
Bul bapqa sáıkes, el aýmaǵynda baǵalar japsyrmasymen resimdelgen, saýda obektisiniń ishki jáne syrtqy vıtrınalarynda qoıylǵan taýardy baǵasyn teńgemen kórsetpeı ótkizý nemese jarııa shart talaptary boıynsha taýardy ótkizgen kezde onyń baǵasyn teńgemen kórsetpeý shaǵyn kásipkerlik sýbektilerine – 6, orta kásipkerlik sýbektilerine – 10, iri kásipkerlik sýbektilerine 30 aılyq eseptik kórsetkish mólsherinde aıyppul salýǵa alyp keledi.
N.Egemberdıevtiń aıtýynsha, osy bap boıynsha ákimshilik jaza qoldanylǵannan keıin bir jyl ishinde zań buzýshylyq qaıtalansa, shaǵyn kásipkerlik sýbektilerine – 65, orta kásipkerlik sýbektilerine – 120, iri kásipkerlik sýbektilerine 200 aılyq eseptik kórsetkish mólsherinde aıyppul salynady.
Sondaı-aq sala basshysy saýda qyzmetin retteý týraly zańnamaǵa sáıkes saýda bazarynyń jumys reglamenti bekitilgenin, onyń talaptary saqtalmaǵan jaǵdaıda da jaýapkershilik qarastyrylǵanyn aıtyp ótti.
«Saýda bazarynyń qyzmetin uıymdastyrý jónindegi «Saýda qyzmetin retteý týraly» zańnyń talaptaryn buzǵany úshin, saýda bazarynyń ákimshisi bekitken saýda bazary reglamentiniń bolmaýy sebepti ÁQBtK-niń 204-2-baby boıynsha 7 saýda bazary eskertý túrinde ákimshilik jaýapkershilikke tartyldy», dedi departament basshysy.
Buǵan qosa osy bappen ákimshilik jaza qoldanylǵannan keıin bir jyl ishinde dál sondaı zańbuzýshylyq taǵy qaıtalanǵan jaǵdaıda 25 AEK mólsherinde aıyppul salynady.