Keńestiń róli artyp keledi

Otyrys jumysyna Ázerbaıjan, Armenııa, Belarýs, Qazaqstan, Qyrǵyzstan, Reseı, Tájikstan, О́zbek­stan, TMD Atqarýshy komıteti men Terrorızmge qarsy ortalyǵynyń delegasııalary qatysty.

QOBK otyrysy barysynda sońǵy otyrystan bastap ótken kezeń­degi ózara is-qımyl jasaý nátıje­leri qaraldy. Arnaýly qyzmetter­diń halyqaralyq terrorızm, zańsyz kóshi-qon, transulttyq qylmys, kıberqylmys jáne esirtki bıznesi salasyndaǵy qaterlerge qarsy is-qımyl jónindegi yntymaqtas­tyǵy­nyń ózekti máseleleri talqylandy.

QOBK otyrysynda Ulttyq qaýip­sizdik komıtetiniń tóraǵasy, ult­tyq qaýipsizdik general-leıtenanty Ermek Saǵymbaev sóz sóılep, memleketke syrttan tónetin qaýip-qaterlerge toqtaldy.

– Bizdiń mamyr aıynda bolǵan Bishkektegi sońǵy kezdesýimizden beri salystyrmaly túrde kóp ýaqyt óte qoıǵan joq. Dese de osy kezeń ishinde TMD-da, jalpy álemde bolǵan oqıǵalar bizdiń eldegi operatıvti jaǵdaıǵa aıtarlyqtaı áserin tıgizip otyr. Halyqaralyq terrorızmge qarsy belsendi áreket etýmen baılanysty mindetter áli de birinshi orynda. Transshekaralyq qylmystardyń, zańsyz kóshi-qon men qarý-jaraq kontrabandasynyń qateri artyp tur. Esirtki trafıgine, ásirese «sıntetıka» delinip júrgen esirtki túriniń taralýy bizdiń muqııat nazar aýdarýymyzdy qajet etedi, – dedi UQK basshysy E.Saǵymbaev.

Sondaı-aq ol uıym elderi sıntetıkalyq esirtki saýdasyna kóbirek mán berý kerektigin atap ótti. Onyń aıtýynsha, san alýan syn-qaterlerdiń artýy Qaýipsizdik organdary basshylary keńesinen yntymaqtastyqty nyǵaıtýdy talap etedi.

Al osy otyrysta negizgi baıandama jasaǵan TMD-ǵa qatysýshy memleketterdiń qaýipsizdik organdary men arnaýly qyzmetteri basshylary keńesiniń tóraǵasy Aleksandr Bortnıkov ta sóz sóılep, terrorızmge qarsy is-qımyldyń basymdyǵyna toqtaldy.

– Keıingi kezdesýde biz «Talıban­nyń» naqty bılikke ıe ekenin, aýmaqty baqylap otyrǵanyn atap óttik. Olardyń áreketteri tártip ornatýǵa jáne turaqtylyqty saqtaýǵa baǵyttalǵan. Barlaý organdary arasynda pragmatıkalyq yntymaqtastyq ornatý eki jaqqa da tıimdi bolady dep oılaımyz. Bul, ásirese halyqaralyq lańkestik uıymdarmen, esirtki jáne qarý-jaraq kontrabandasymen kúres aıasynda ózekti bolyp otyr, – dedi A.Bortnıkov.

Sonymen qatar ol «Talıban» Aýǵanstandaǵy DAISh-tiń eń qaýipti tarmaqtarynyń biri sanalatyn «Vılaıat Horasan» tobyna qarsy turýǵa daıyn ekenin atap ótti.

Otyrys qorytyndylary bo­ıynsha arnaýly vedomstvolar­dyń basshylary yntymaqtastyqtyń nysandary men baǵyttaryn keńeıtý, sondaı-aq TMD memleketteri­niń qaýip­sizdigin qamtamasyz etý jónin­degi jumystaǵy ózara is-qımyldy nyǵaıtý qajettiligi týraly ortaq pikirge keldi.

Jalpy, TMD-ǵa qatysýshy mem­­leketterdiń qaýipsizdik organdary men arnaýly qyzmetteri basshylarynyń keńesi halyqaralyq sıpattaǵy uıymdasqan qylmysqa qarsy kúres salasyndaǵy jáne qyz­mettiń basqa da kelisilgen sala­­laryndaǵy arnaýly qyzmet­terdiń ózara is-qımyl jasaýy ári olar­dyń is-áreketin úılestirý úshin 1997 jylǵy 28 naýryzda TMD mem­leketteri basshylary keńesiniń sheshimimen qurylǵan.