Qostanaı aýdandyq sotynda aqbókenniń múıizin zańsyz saqtaý jáne tasymaldaý arqyly asa iri zalal keltirgen dep aıyptalǵan adamǵa qatysty qylmystyq is qaraldy, dep habarlaıdy Egemen.kz.
Joǵarǵy sottyń málimetinshe, sottalýshy zańsyz jolmen alynǵan aqbóken múıizderin Astanadan Qostanaıǵa tasymaldaýǵa shyqqan. Ol úshin kólik júrgizýshisin jaldaǵan. Alaıda, olardy Áýlıekól tas jolynda polısııa bóliminiń qyzmetkerleri toqtatqan.
Anyqtalǵandaı, sottalýshydan jalpy quny 2 mlrd teńgeden asatyn 823 zańsyz jolmen alynǵan aqbóken múıizi tárkilengen.
Prokýror sottalýshyny 10 jylǵa bas bostandyǵynan aıyrýdy suraǵan. Al jábirlenýshi taraptyń ókili baptyń sanksııasy shegindegi jazany talap etken.
Sottalýshy óz kinásin moıyndamaǵan.
Nátıjesinde, jasalǵan is-árekettiń jeke basyn, sıpaty men qoǵamdyq qaýiptilik dárejesin jáne istiń mán-jaıyn eskere otyryp, sottalýshy 8 jylǵa bas bostandyǵynan aıyrylyp, 5 jylǵa ańshylyqpen baılanysty qyzmetpen aınalysý quqyǵynan aıyrylǵan.Sot úkimi zańdy kúshine engen joq.