Ǵylym jáne joǵary bilim mınıstri Saıasat Nurbek Penn State University dekany Stıven Gordon Barnspen kezdesti. Kezdesý aıasynda amerıkandyq joǵary oqý ornynyń qazaqstandyq seriktesterimen yntymaqtastyǵy týraly birqatar mańyzdy máseleler talqylandy, dep jazady Egemen.kz.
Áńgimelesý barysynda taraptar ekijaqty yntymaqtastyq pen stýdenttermen almasý úshin Qazaqstan aýmaǵynda Penn State University kampýsyn ashý perspektıvasyn, amerıkalyq oqý ornynyń fılıalynda mamandar daıarlaý úshin basym bilim berý baǵdarlamalaryn aıqyndaýdy, sondaı-aq ǵylymı zertteýler men tehnologııalardy damytý salasyndaǵy áleýetti uzaq merzimdi halyqaralyq áriptestikterdi qarastyrdy.
«Memleket basshysy Ǵylym jáne joǵary bilim mınıstrligine Qazaqstanda sheteldik joǵary oqý oryndarynyń fılıaldaryn ashý mindetterin qoıyp otyr. Biz halyqaralyq stýdentterdi tartý úshin Qazaqstandy jahandyq akademııalyq habqa aınaldyrǵymyz keledi, bul álemniń jetekshi ýnıversıtetterimen yntymaqtastyqty edáýir keńeıtýge múmkindik beredi», dedi Saıasat Nurbek.
Mınıstr qolaıly bilim berý ortasyn qurýdyń mańyzdylyǵyna toqtaldy. Ol aǵylshyn tilinde ótetin baǵdarlamalar, halyqaralyq zertteý bastamalary men almasý baǵdarlamalaryn qamtýy tıis. Ol Qazaqstandaǵy bilim sapasyn arttyryp qana qoımaı, sheteldik áriptestermen bilim men tájirıbe almasýdy qamtamasyz etetini atap ótildi.
Penn State University dekany Qazaqstannyń aýmaǵynda sheteldik ýnıversıtetterdiń fılıaldaryn jobalaý jáne ornalastyrý tájirıbesin joǵary baǵalap, elimizdiń áriptestik ózara is-qımyldy júzege asyrýdaǵy oń úrdisin atap ótti.
«Mundaı jaǵdaılar Penn State University-dyń bolashaqtaǵy yntymaqtastyqty jalǵastyrýǵa jáne tereńdetýge degen senimin aıtarlyqtaı arttyrady», dedi Stıven Gordon Barns.
Kezdesý sońynda taraptar yntymaqtastyqty keńeıtýge daıyn ekendikterin bildirdi.
Esterińizge sala keteıik, Penn State University 2022 jyldan bastap Qazaqstandyq stýdentter men oqytýshylardy oqytýǵa 3 mln. AQSh dollarynan astam granttyq qarjylandyrý bóldi.