Astana qalasynda oqýshylar arasynda respýblıkalyq pikirsaıys týrnıri ótti, dep habarlaıdy Egemen.kz.
Oqý-aǵartý mınıstrliginiń baspasóz qyzmeti málim etkendeı, bıyl atalǵan týrnırge qalalyq jáne oblystyq kezeńderden jeńimpaz bolyp tanylǵan 180 oqýshy qatysty.
Ár óńirden qazaq, aǵylshyn, orys lıgalary boıynsha 9 oqýshy joldama aldy. Týrnır pikirsaıystyń Dúnıejúzilik mektep formaty (WSDC) boıynsha ótti. Qatysýshylar irikteý jáne qorytyndy oıyndarda baq synady.
Kóshbasshylyq qabilet pen synı oılaýdy qalyptastyrý turǵysynda pikirsaıystyń alatyn orny erekshe ekenin atap ótken mınıstr Ǵanı Beısembaev óńirlik kezeńge 81 myńnan astam oqýshy qatysqanyn, bul byltyrǵy jylmen salystyrǵanda 30 myńǵa artyq ekenin tilge tıek etti.
«Pikirsaıys – tek jarys alańy ǵana emes, bul óz oıyn erkin bildirýdiń, pikir almasýdyń tamasha quraly. Sizder óz bilimderińizdi dáleldep qana qoımaı, sondaı-aq komandada jumys isteý, ózgelerdiń pikirine qulaq qoıý, mámilege kelý sekildi ómirlik mańyzdy daǵdylardy meńgerdińizder. Sizderdi quttyqtaı otyryp, osy alańda alǵan tájirıbelerińiz aldaǵy ýaqytta bıik maqsatqa umtylýlaryńyzdyń alǵysharty bolsyn dep tileımin», dedi mınıstr.
Eki kúnge sozylǵan baıqaý nátıjesinde III orynǵa Aqtóbe, Qaraǵandy oblystary taban tirese, II oryndy Almaty oblysy, Shymkent, Almaty qalalary ózara bólisti. Al I orynǵa Astana, Almaty qalalary jáne Qaraǵandy oblysy laıyq dep tanyldy.
«Úzdik spıker» nomınasııasy: Álıhan Aıtbaev – Astana, Aıajan Oljageldi – Qaraǵandy oblysy, Dana Aıtqalıeva – Abaı oblysy.
«Úzdik orator» nomınasııasy: Jibek Mels – Almaty qalasy, Sofıa Malysheva – Pavlodar oblysy, Kamshat Erkinbek – Jetisý oblysy.
Aıta ketsek, qazirgi ýaqytta elimizde 7684 pikirsaıys klýby jumys isteıdi, onyń 6963-i - mektep klýbtary.