Pavlodarda Keńes Odaǵynyń batyry Mahmet Qaıyrbaev týraly jazylǵan kitaptyń tusaýy kesildi. Týyndy «Jızn zamechatelnyh lıýdeı» serııasymen jaryq kórgen.
Osy ýaqytqa deıin «Jızn zamechatelnyh lıýdeı» serııasymen 1 500-den astam eńbek jaryq kórgen. Sonyń birazy Qazaqstannyń kórnekti tulǵalaryna arnalǵan. Atalǵan serııamen shyqqan birtýarlar – Shoqan Ýálıhanov, Kenesary Qasymuly, Sáken Seıfýllın, Qunanbaı О́skenbaıuly, Qanysh Sátbaev, Muhtar Áýezov, Shákárim Qudaıberdiuly, Ermuhan Bekmahanov, Evneı Bóketov, t.b. Endi bul tizim Mahmet Qaıyrbaev esimimen tolyǵyp otyr.
«Mahmet Qaıyrbaev» kitabynyń avtory – batyrdyń uly Murat Qaıyrbaev. Avtor muraǵat materıaldaryn paıdalana otyryp, ákesi Mahmet Qaıyrbaevtyń ómirbaıanyndaǵy buryn belgisiz bolǵan faktilerge quqyqtyq turǵydan baǵa bergen.
– Ákemniń ómirbaıanyn jazý onyń ómirindegi keıbir oqıǵalarǵa túrtki boldy. Ákem 1982 jyly zeınetke shyqqannan keıin de qoǵamdyq jumysqa belsene aralasyp, maıdangerlerdiń erlikterin jıi eske alyp, jaǵdaılaryna alańdap júretin. Qazir men de zeınetkermin. Ákemniń sol kezdegi oıǵa alǵan josparlaryn júzege asyrýǵa az da bolsa úlesimdi qosqym keledi, – deıdi Murat Mahmetuly.
Beıbit ýaqyttaǵy Mahmet Qaıyrbaevtyń eńbek joly Pavlodar oblysynyń damýymen tyǵyz baılanysty. Tyń ıgerý men mal sharýashylyǵyn órkendetý, oblystyń ónerkásiptik áleýetin damytýda qol jetkizgen jetistikteri úshin keńestik memlekettik nagradalarmen marapattaldy.
Is-sharada batyr týraly derekti fılm kórsetilip, kitap kórmesi usynyldy.
PAVLODAR