Sot ákimshiliginde 2024 jyldyń 9 aıyndaǵy jumys qorytyndysy shyǵaryldy, dep habarlaıdy Egemen.kz vedomstovnyń baspasóz qyzmetine silteme jasap.
Sot ákimshiliginiń basshysy Naıl Ahmetzakırov bıylǵy úsh toqsannyń qorytyndysy boıynsha aýmaqtyq bólimshelerdiń basshylarymen keńes ótkizdi. Kezdesý barysynda N.Ahmetzakırov jaqynda ótken sýdıalardyń IX sezinde Memleket basshysynyń alǵa qoıǵan mindetteri aıasynda birqatar basym baǵyttardy atap ótti.Atap aıtqanda, sottardy odan ári ońtaılandyrý, ınfraqurylymdy damytý, ınnovasııalyq tehnologııalar men jasandy ıntellekt kómegimen sot isin júrgizýdi jeńildetý, eksaýmaqtyq sottylyqty keńeıtý týraly áńgime boldy. Jumys nátıjeleri týraly Astana, Shymkent, Qostanaı, Jambyl jáne Túrkistan oblystary SÁ departamentteriniń basshylary esep berdi.
Departament basshylary Eldos Jumaqsanov pen Berik Meıirhanov Astana men Shymkent qalalarynda júrgizilip jatqan jalpy ıýrısdıksııadaǵy aýdandyq sottardyń birigýiniń oń nátıjesin atap ótti. Ońtaılandyrý sýdıalardyń júktemesin teńestirýge, bıýdjet shyǵyndaryn qysqartýǵa, sottylyqqa qatysty daýlardan týyndaǵan qaǵazbastylyqty joıýǵa jáne jeke shaǵymdardyń sanyn azaıtýǵa múmkindik berdi. Qazirgi ýaqytta Joǵarǵy Sot Tóraǵasynyń tapsyrmasy boıynsha basqa óńirlerde de osyndaı ońtaılandyrýdy júrgizý múmkindigi zerttelip jatyr.
«Sonymen qatar jıynda IT-ónimderdi paıdalaný nátıjeleri de aıtyldy. Sot oryndaýshylarynyń sanksııalaý qaýlylaryn jáne sot buıryǵyn shyǵarýyna robottandyrýdyń engizilýi sottardaǵy bıznes-prosesterdi aıtarlyqtaı jeńildetti, bul jalpy alǵanda atalǵan ister boıynsha sot tóreligin júzege asyrý sapasyna jáne olardaǵy shaǵymdardyń azaıýyna oń áser etti. Sondaı-aq aýmaqtyq departamentterdiń basshylary sýdıalar arasynda «Sıfrlyq sot saraptamasy» IT-servısine degen suranysty atap ótti. Osy modýl paıdalanatyn jasandy ıntellekt Sot aktileri bankiniń taldaýy negizinde istiń nátıjesin boljaıdy», delingen habarlamada.
Naıl Ahmetzakırov «Tórelik 2.0» jańartylǵan nusqasy, sot organdarynyń biryńǵaı portaly, «E-zań kómegi» júıesi jáne ákimshilik isterdi eksaýmaqtan tys bólý iske qosylǵanyn habarlady. Sonymen qatar ınfraqurylymdyq jobalardy júzege asyrý barysy talqylandy.
Aıta keteıik, bıyldyń ózinde Túrkistan oblystyq sotynyń, Pavlodar jáne Atyraý qalalyq sottarynyń, Soltústik Qazaqstan oblysynda Ǵ.Músirepov, Shyǵys Qazaqstan oblysynda Glýbokovskıı, Batys Qazaqstan oblysynda Bókeıorda aýdandyq sottarynyń 6 jańa ǵımaraty paıdalanýǵa berilgen.Al, Abaı aýdany jáne Borodýlıha aýdandyq soty ǵımarattarynyń qurylysy jaqynda aıaqtalady. Jergilikti atqarýshy organdarmen birlese otyryp, Aqtóbe, Pavlodar, Almaty, Batys Qazaqstan, Túrkistan jáne Mańǵystaý oblystarynda sot ǵımarattarynyń qurylysy boıynsha 13 jobany ázirleý prosesi júrip jatyr, onyń ekeýiniń qurylysy 2025 jyldyń basyna josparlanǵan.Jalpy, qabyldanǵan júıeli sharalar sot júıesine degen senimniń artýyna oń áserin tıgizdi. Halyq seniminiń absolıýtti deńgeıi 0,8%-ǵa (2023 jylmen salystyrǵanda) artyp, sottardaǵy jumysty uıymdastyrý jaqsara túsken.Kezdesý qorytyndysy boıynsha N.Ahmetzakırov Sot ákimshiligi qyzmetiniń negizgi baǵyttary boıynsha birqatar naqty mindet qoıdy. Atap aıtqanda, Basshy óńirlik bólimshelerdiń nazaryn qarjylyq tártip pen sybaılas jemqorlyqqa qarsy zańnamany qatań saqtaý qajettiligine aýdardy.Sondaı-aq aýmaqtyq organdarǵa taldaý jumystaryn jáne kadrlyq jumysty kúsheıtý tapsyryldy.