Roza Baǵlanova atyndaǵy «Qazaqkonsert» ortalyq konsert zalynda Respýblıka kúnine arnalǵan saltanatty is-shara ótti, dep habarlaıdy Egemen.kz.
Is-sharaǵa kórnekti mádenıet jáne óner qaıratkerleri, jýrnalıster, aqparat salasynyń qyzmetkerleri qatysty. QR Mádenıet jáne aqparat mınıstri Aıda Balaeva sóz sóılep, qatysýshylardy merekemen quttyqtady.
«Qaıyrly kún ardaqty qaýym, qurmetti áriptester! Jalpy táýelsizdigimizdiń arqasynda, búgin barshańyzǵa elimizdiń ár salasynda kúndelikti aıanbaı tókken eńbekterińiz úshin rızashylyǵymdy bildiremin. Sizderdiń qajyrly eńbekterińizdi eskerip, Prezıdentimiz búgin memlekettik nagradalar týraly jarlyq shyǵardy. Bul barlyǵymyz úshin úlken súıinshi habar. Sebebi, ár adam úshin óz eńbeginiń baǵalanýy – úlken baqyt. Bul bizdiń salaǵa berilgen joǵary baǵa ári mártebe dep bilemiz», dedi Aıda Balaeva.
Kesh barysynda mınıstr QR Prezıdentiniń atynan eldiń damýyna eleýli úles qosqan birqatar mádenıet jáne óner salasynyń qaıratkerine túrli marapat tabystady. Atap aıtsaq, Memleket basshysynyń Jarlyǵymen belgili estra ánshisi Maıra Ilııasovaǵa jáne «Astana Opera» memlekettik opera jáne balet teatry bas dırıjeriniń orynbasary Abzal Muhıtdınge «Qazaqstannyń halyq ártisi» ataǵy berildi.
Sondaı-aq Qazaq ulttyq óner ýnıversıtetiniń dosenti Álıbı Ábdinurov, «Astana Balet» teatrynyń balet solısi Aınur Ábilǵazına, «Astana Opera» memlekettik opera jáne balet teatrynyń balet trýppasynyń tálimger ustazy Damıra Zaınýllına, Roza Baǵlanova atyndaǵy «Qazaqkonsert» memlekettik akademııalyq konserttik uıymynyń keńesshisi Ǵazıza Ǵabrahımova, Qalıbek Qýanyshbaev atyndaǵy Qazaq ulttyq mýzykalyq drama teatrynyń ártisi Baqyt Jumaǵulova, Roza Baǵlanova atyndaǵy «Qazaqkonsert» memlekettik akademııalyq konserttik uıymynyń ártisi Súleımen Ibragımov, Qazaq ulttyq óner ýnıversıtetiniń professory Nazıra Muqysheva, Astana qalasyndaǵy Qazaqstan Respýblıkasynyń Ulttyq akademııalyq kitaphanasynyń basshysy Ǵazıza Nurǵalıeva, Qalıbek Qýanyshbaev atyndaǵy Qazaq ulttyq mýzykalyq drama teatrynyń aktrısasy Rymkesh Omarhanova, Qazaq ulttyq óner ýnıversıtetiniń aǵa oqytýshysy Alma Syrbaeva, Qazaq ulttyq óner ýnıversıtetiniń «Dástúrli án» kafedrasynyń meńgerýshisi Erbol Sarın «Qazaqstannyń eńbek sińirgen qaıratkeri» ataǵymen marapattaldy.
Memleket basshysynyń Jarlyǵymen birqatar azamatqa «Parasat», II dárejeli «Dostyq», «Qurmet» ordenderi, «Eren eńbegi úshin» jáne «Shapaǵat» medaldary tabystaldy. Sonymen qatar elýden astam vedomstvolyq nagradalar, qurmet gramotalary men alǵys hattar tapsyryldy.
Marapattaý rásiminen keıin Roza Baǵlanova atyndaǵy «Qazaqkonsert» memlekettik akademııalyq konserttik uıymynyń ujymy usynǵan konserttik baǵdarlama usynyldy.