Maldardyń osy aýrýǵa qarsy egilmegenin bile tura, olardyń jappaı qyryla bastaǵanynan sekem alyp, aýyl ákimderi dárigerlerge der kezinde habarlaýy kerek edi. Jalpy, aýyldyq aýmaqtar boıynsha turǵyndarǵa bul jaıynda habarlap, saqtandyrý sharalary atqarylmaǵan. Aqsý qalasy aýmaǵyna qarasty aýyldarda oryn alǵan adam ólimine ákelgen tótenshe oqıǵa mal ustap otyrǵan oblystyń basqa aýdandarynyń aýyl ákimderiniń jumystaryna sabaq bolar degen oıdamyz.
Adam ólimine alyp kelgen mundaı aýyr indet Aqsý qalasy Jolqudyq aýyldyq aýmaǵyna qarasty Revrovka jáne Qarakól aýyldarynda oryn aldy.О́kinishke qaraı, jeke aýlasynda ózi soıǵan maldyń sibir jarasy aýrýyn juqtyrǵanynan múlde habarsyz aýyl turǵyny osy indettiń kesirinen aýrýhanada kóz jumdy. Odan keıin de osy aýyldyń taǵy da tórt turǵyny ózderin jaısyz sezinip, aýyra bastaǵan, qazir olar da aýrýhanada jatyr. Dárigerler olardy baqylaýda ustap otyr. Aýyrǵan maldy laqtyrýǵa qımaı, aýyl adamdaryna taratyp bergen salaqtyq pen jaýapsyzdyqtyń aıaǵy, mine, osyndaı qaıǵyly jaǵdaılarǵa alyp keldi. Sonyń kesirinen taǵy 80-ge jýyq adam dárigerlerdiń baqylaýyna alyndy. Taǵy bir adam aýyr halde jatyr.
Jalpy, osy aýyldyq aýmaqta maýsym aıynan beri 5 mal ólgen kórinedi. Alaıda, maldardyń ólgenin jappaı ýlaný dep qarap, mal dárigerlerine habar bermesten eti bir emes, eki birdeı aýyl adamdaryna taratylyp berilgen. Memlekettik sanıtarlyq-epıdemıologııalyq qadaǵalaý komıtetiniń bastyǵy Qanat Sákıev jýrnalıstermen ótkizgen baspasóz máslıhatynda “Maldardyń qandaı indetke ushyraǵanyn mal dárigerleriniń ózderi bilmeı otyrsa, qarapaıym aýyl turǵyndaryna ne aıtýǵa bolady. Polıseıler ólgen maldardy taýyp aldy. Qazir olardy kómip, órteý jumystary júrgizilýde”, – dedi.
Aýyldaǵy maldardyń sibir jarasy aýrýyna qarsy egilmegeni, egý jumystaryna qajetti dári-dármekterdiń der kezinde jetkizilmegeni de anyqtalyp otyr. Bul aýyldarda maldar arasyndaǵy sibir jarasy indeti sonaý 1967 jyly tirkelipti, mal mamandary bul qozdyrǵysh indet topyraqta 60 jyl ómir súredi jáne saqtalady deıdi.
Farıda BYQAI, PAVLODAR.