«2025 – 2027 jyldarǵa arnalǵan respýblıkalyq bıýdjet týraly» zań jobasy, elimizdiń 2029 jylǵa deıingi áleýmettik-ekonomıkalyq damý boljamy negizinde ázirlengen edi. Osyǵan sáıkes Májilistiń jalpy otyrysynda Qarjy mınıstri Mádı Takıev baıandama jasady, dep habarlaıdy Egemen.kz.
Mınıstrdiń aıtýynsha, 2025 jylǵy túsimder bıylǵy jylmen salystyrǵanda 1,2 trln teńgege ulǵaıa otyryp 21,7 trln teńge deńgeıinde boljanyp otyr.
«Zań jobasyn talqylaý barysynda halyqtyń ómir súrý sapasyn arttyrýǵa jáne óńirlerdi damytýǵa baǵyttalǵan birqatar usynystar engizildi.Onyń ishinde, halyqty taza sýmen qamtamasyz etýge, jylý-elektr energetıkasyn, kólik, ınjenerlik-kommýnıkasııalyq ınfraqurylymyna, sondaı-aq «Aýyl – el besigi» jobasyn iske asyrýǵa qosymsha shyǵystar kózdelgen.Sonymen qatar, tegin medısınalyq kómektiń kepildik berilgen kólemi sheńberinde medısınalyq qyzmetter kórsetýge, sybaılas jemqorlyqqa qarsy saraptama júrgizýge arnalǵan shyǵystar qarastyrylǵan.
Atalǵan túzetýlerdi eskere otyryp, bıýdjet shyǵystarynyń negizgi baǵyttary kelesideı qalyptasty.
Birinshi baǵyt – áleýmettik salany damytý.Bıýdjet, ótken jyldardaǵydaı áleýmettik baǵdarlanǵan bolyp qala beredi. 2025 jyly áleýmettik salanyń shyǵystary aǵymdaǵy jylǵa qaraǵanda 862 mlrd. teńgege ulǵaıyp, 9,8 trln teńge kóleminde josparlanýda. Onyń bıýdjet shyǵystaryndaǵy úlesi 38 %-dy quraıtyn bolady.
Ekinshi baǵyt – óńirlerdi qoldaý. 2025 jyly óńirlerge respýblıkalyq bıýdjet qarajaty esebinen 7,5 trln teńge bólinedi. Bul soma aǵymdaǵy jylmen salystyrǵanda 405 mlrd teńgege artyq.Ol – bıýdjettiń jalpy shyǵystarynyń shamamen 30%-yn quraıdy.
Úshinshi baǵyt – ekonomıkanyń naqty sektoryn damytýdy qoldaý. 2025 jyl bul baǵyt boıynsha 2,1 trln teńge qarastyrylǵan. Onyń ishinde, Memleket basshysynyń tapsyrmasyna sáıkes agroónerkásiptik keshendi damytý kúsheıtildi. Osy baǵytqa 2025 jyly aǵymdaǵy jylmen salystyrǵanda 30%-ǵa ulǵaıa otyryp, 635 mlrd teńge qarastyryldy», dedi mınıstr óz sózinde.
Qorytyndylaı kele Mádı Takıev Memlekettiń qorǵanys qabileti men qaýipsizdigin qamtamasyz etý, quqyqtyq tártipti qorǵaý jáne ishki turaqtylyqty qoldaý jónindegi is-sharalar tolyq kólemde júzege asyrylatynyn jetkizdi.