Chernogorııanyń Býdva qalasynda jastar arasynda bokstan álem chempıonaty túńligin túsirdi. 22 qazanda bastalyp, 3 qarashada máresine jetken álemdik dodada jas boksshylarymyz 17 medal oljalap, jalpy esepte top bastady.
Buǵan deıin ótken álem birinshilikterde jalpykomandalyq esepte kósh basyna shyǵý buıyrmaı kelgen edi. Dúbirli dodaǵa attanar aldynda bapkerler: «Qyz-jigitter senimdi aqtaıtynyna senemiz, abyroımen oralýǵa kúsh salamyz», degendi tekke aıtpaǵan eken. 6 altyn, 1 kúmis, 10 qola medal oljalaǵan sańlaqtar senimge selkeý túsirgen joq.
Bilikti maman Maqsat Baqtybazarov álem chempıonatynyń aldynda ǵana jastar quramasynyń (erler) aǵa bapkeri laýazymyna taǵaıyndaldy. Qysqa ýaqyt ishinde óziniń biliktiligin tanyta bildi. 51 kg salmaqta dodaǵa kirgen Boranbek Beksultan aldymen Zımbabve eliniń boksshysyn, ekinshi aınalymda Moldova úmitin yǵystyryp, shırek fınalda Reseı boksshysyn jeńdi. Jartylaı fınalda Iran sportshysyn aıqyn utyp, altyn medal jolyndaǵy jekpe-jekte kolýmbııalyq Djastın Morenony shúbásiz jeńdi.
Jastar komandasynyń kapıtany, 67 kg salmaq dárejesinde synǵa túsken Tórehan Sabyrhan álem chempıonatyna jaqsy daıyndyqpen kelgenin kórsetti. Alǵashqy jekpe-jekte chernogorııalyq qarsylasy aıqastan bas tartyp, rıngke shyqqan joq. Ekinshi kezeńde Aýǵanstan eliniń ókilin aıqyn basymdyqpen jeńip, bes tóreshi de jeńisti jerlesimizge berdi. Shırek fınalda ózbekstandyqty, jartylaı fınalda Qytaı boksshysyn da erkin utty. Al fınalda kýbalyq Devıd Espınosadan basym túsip, álem chempıony atandy. Dodanyń úzdik boksshysyna beriletin arnaıy marapat ta Tórehanǵa buıyrdy.
71 kg salmaq dárejesinde О́ner Seıilhan kelesheginen kemel úmit kúttiretinin ańǵartty. Belarýs, Pákistan, Albanııa, О́zbekstan elderiniń boksshylaryn qapy qaldyryp, fınaldyq tartysta reseılik Alekseı Gýkovty utty.
Enshimizge buıyrǵan tórtinshi altyn medaldy 75 kg salmaq dárejesinde synǵa túsken Sanjaráli Begalıev oljalady. Ol Rýmynııadan kelgen qarsylasyn, Bolgarııa boksshysyn aıqyn utyp, shırek fınalda kýbalyqty jeńip, jartylaı fınalda Polsha boksshysyn súrindirdi. Al fınalda ózbek Djafarbek Shahbazovty utty.
Erler synynda Dıas Berikbaı (48 kg), Janseri Kósherbaev (57 kg), Rasýl Asanhanov (92 kg), Aslan Edilbaıuly (92 kılodan joǵary) jartylaı fınalda súrinip, álem chempıonatynyń qola júldesin mise tutty.
Jangeldi Ahmetov baptaıtyn qyzdarymyz da Býdvadan tolaıym tabyspen oraldy. 50 kg salmaqta Elıanur Turǵanova Túrkııa, О́zbekstan, Grekııa boksshylarynan basym túsip, fınalǵa shyqty. Álem chempıony ataǵy úshin ótken tartysta Karla Pıkti (beıtarap qatysýshy) jeńdi.
81 kg salmaqta Arýjan Zeınollaeva shırek fınalda reseılikti, jartylaı fınaldyq jekpe-jekte polıak boksshysyn utty. Fınalda syralǵy qarsylasy ózbek qyzy Rýhshona Parpıevany jeńip, álem chempıony atandy.
66 kg salmaqta Túrkııa, Reseı eliniń sportshylaryn utyp, jartylaı fınalda rýmyn boksshysyn 2-raýndta aıqyn basymdyqpen jeńgen Uldana Taýbaıǵa da altyn medal oljalaıdy dep zor senim artylǵan edi. О́kinishke qaraı, ırlandııalyq Kaıla Doılǵa ese jiberip, kúmis medaldy mise tutty.
Ánel Ábdirasylova (48 kg), Baǵjan Otynbaı (52 kg), Tolǵanaı Qasymhan (60 kg), Arýjan Jańabaeva (63 kg), Shuǵyla Nálibaı (75 kg), Panar Seıithanqyzy (+81 kg) álem chempıonatynyń qola júldesin ıelendi.
Úsh jyl burynǵy Tokıo, bıylǵy Parıj jazǵy Olımpııa oıyndarynda boksshylardyń quldyraýy saladaǵy túıtkil tym tereńdep ketkenin ańǵartqan edi. Qazaq boksynda aldaǵy ýaqytta býyn almasý kezeńi aıqyn, ádil ótip, jumys júıeli júzege asýy úshin aýqymdy reformalar júrgizý qajettigi kóp aıtyldy. Tipti alǵashqy qadamdar jasalyp, nátıjesi de kórine bastady. Tórt jyldan keıin ótetin jazǵy Olımpııa oıyndarynda, ıaǵnı Los-Andjeles (AQSh) rınginde osy boksshylardyń jolynan júlde kútemiz.
Býdvadaǵy álem chempıonatynda boksshylarymyz 6 altyn, 1 kúmis, 10 qola medal oljalasa, ekinshi satyǵa jaıǵasqan О́zbekstan jastary 5 altyn, 5 kúmis, 3 qola, úshtikti túıindegen Reseı sportshylary 3 altyn, 3 kúmis, 4 qola medaldy qanaǵat tutty.