Atyraýǵa bir aptadan beri birneshe kún jańbyr jaýyp, munaıly qalanyń kóshelerin sý basqan. Al búgin alǵashqy qar jaýdy, dep habarlaıdy Egemen.kz.
Búgin, 6 qarashada Atyraýda ekpindi jel turyp, aýa temperatýrasy aıtarlyqtaı tómendegen.
Atyraý oblysynyń Tótenshe jaǵdaılar departamenti 5 qarasha kúni oblys turǵyndary men qonaqtaryna aýa raıynyń qolaısyzdyǵy týraly eskertken edi.
«Atyraý oblysynda «Qazgıdromet» RMK boljamyna sáıkes, 6 qarashada jel kúsheıedi. Jeldiń ekpini sekýndyna 18-23 metrge jetedi. Osyǵan oraı, oblys turǵyndary men qonaqtaryna múmkindiginshe úılerinen shyqpaýdy, balalardy erekshe baqylaýǵa alýdy, qaraýsyz qaldyrmaýdy, qoǵamdyq kólik aıaldamalarynda abaı bolýdy, jáne bılbordtar men aıaqtalmaǵan qurylys nysandarynan aýlaq bolýdy eskertemiz», delingen habarlamada.
Aıta keteıik, óńirde qysqy maýsymǵa daıyndyq arnaıy tehnıkalardy tekserýden bastalǵan. Sondaı-aq, Atyraý qalasyna qysqy maýsymda joldarǵa sebý úshin 400 tonna tuz qajet ekeni atap ótildi.