Bekzat Sattarhan atyndaǵy sport kesheni chempıondardy baptaıdy

Barsha jergilikti turǵyndar men sportshylardy qýantatyn jańa­lyqty «Samuryq-Qazyna» AQ kom­panııalar toby atynan «Samruk-Kazyna Trust» áleýmettik joba­lardy damytý qory men Túrkistan oblysy ákimdigi birlese júzege asyryp jatyr. Nátıjesinde, dúbirli dodalardy ótkizýge arnalǵan sport nysany 320 kórermendi syıdyryp, úlken zal men birneshe jattyǵý alańdary ashylmaq. Buǵan deıin, atalǵan mekemede 1500-den asa sportshy jattyǵyp, 75 bapker jumys atqarsa, endi olardyń qa­tary kóbeıe túsetini kózdeledi. Sony­men qatar sporttyq-máde­nı sharalar sanyn arttyryp, jetis­tikterge umtylý rýhyn shyńdaı­tyn qurylys barysynda da, keshen paıdalanýǵa tabystalǵanda da qurylatyn jumys oryndary aımaqtaǵy jumyssyzdyqty qys­qartpaq. Qordyń 500 mıllıon teńge somasyndaǵy kómegi aıasynda árleý men boıaý, oıý-órnek salý, jylý men jeldetý, sý men káriz qurylymdaryn júrgizý, elektr qýatyn tartý, aýmaqty kógal­­dandyrý men abat­tandyrý, teh­no­logııalyq qural-jab­dyq­pen qamtamasyz etý jaǵdaıy jaq­sa­ratyny kútilýde. Budan tys, ústel tennısin oınaý alańqaıy qa­rastyrylǵan.

Ábdisalan Nurmahanov atyn­daǵy Olımpıada rezerviniń ma­man­dan­dyrylǵan balalar men jasóspirimder sport mektebi 1999 jylǵy 24 jeltoqsanda iske qo­sylǵan. Buqaralyq sportty damy­týda, ıaǵnı jastardy salamatty ómir saltyna beıimdeý, sport pen dene tárbıesine baýlýda júıeli is-qımyldar tyndyrylǵanmen, óńir, onyń ishinde kıeli shahar­dyń tynysy keńeıip, jańa da batyl qadamdardyń qajettiligi sezil­gen. Tozǵan ǵımaratty súrip, zaman talabyna saı jańǵyrtý, ozyq ınfraqurylymdy qalyptastyrý sheshimi qabyldanǵan.

«Mektebimizde 18 bólim turaq­ty jumys istep tur. Olar – boks, dzıýdo, taekvondo, erkin, grek-rım men qazaq, sambo, belbeý kúresteri, tennıs, taekvondo ITF, pankratıon jáne aralas ámbebap jekpe-jek jáne greplıng (AIGA nusqasy), ýshý kýng-fý, djıý djıtsý, mýaıtaı, kıkboksıng, penchak sılat, batýttyq gımnastıka syndy sport túrleri. ­4 eń­bek sińirgen jattyqtyrýshymyz bar. Halyqaralyq dárejedegi 4 sport sheberi bolsa, 110 sport sheberi ózgelerge úlgi-ónege tanytýda», dep áńgimeleıdi Túrkistan oblysy dene shynyqtyrý jáne sport basqarmasynyń basshysy mindetin atqarýshy Almas Naqypbekov.

Bıyl túrkistandyq sportshylar el chempıonattarynda 35 altyn, 34 kúmis, 63 qola medal en­shilegen. Álem kýboginde 1 qola qor­jynǵa tússe, Álem chempıonatynda 2 júldeger jeńis tuǵyryna kóterilip, Azııa chempıonattarynda 24 altyn, 5 kúmis, 2 qola qanjyǵany maılaǵan.

«Úlken sport kesheni­niń tusaýy kesiletin, halyq ıgiligine jaraıtyn ýaqyt jaqyndap qaldy. Bul da bir bitken, aýyz toltyryp aıtarlyqtaı jemisti is bolatany anyq. Bekzat Sattarhanov aǵamyzdyń esimin ıelenetin nysan­da talaı daryndy sportshy jatty­ǵyp, bıik belesterdi baǵyndyra­dy, ataqty jerlesimiz­diń dańq­ty jeńisin qaıtalaıdy dep senemiz. Qazaq sportynyń jankúıerlerine atalǵan oqıǵa qutty bol­syn degim keledi», dep oıyn bildirdi bokstan álem chem­pıony, sport klýbynyń dırek­tory Qaı­rat Eralıev.

B.Sattarhanov dańǵylynda orna­las­qan chempıondar mektebi­niń shákirtteri men túlekteri retinde dzıýdoshylar Dıdar Hamza, 2028 jyly AQSh-tyń Los-Anjeles qa­lasynda ótetin Olımpıadaǵa bapta­lyp, úkilenip otyrǵan Aıdar Arapov, sambodan Qazaqstannyń bir­ne­she dúrkin chempıondary, álemdik jarystardyń júldegerleri, ba­lýan qyzdar Aıjan Jylqybaeva men Ulbosyn Ádilova, áıelder kúresi­nen Nıýlıfar Raımova men Mádına Aman, basqa da bolashaq talantty jarqyn juldyzdardyń attary atalady. Kásipqoı boks­shy, Bek Nurmaǵanbetti de Túrkistan oblystyq sport mektebi maqtan tutady. Máselen, tek bokstan álem chempıony, Olımpıada oıy­n­da­rynyń júldegeri, halyqaralyq sa­ıys­­tar­dyń 25, el chempıo­natta­rynyń 20 jeńimpazy shyqqan.

Jalpy, derekkózge súıensek, Túrkis­tan qalasynda 220 myńnan astam adam tursa, olardyń 20 pa­ıyzy turaqty sport­pen shu­ǵyldanady. Bul rette sport oryndaryna zárýliktiń joǵary ekeni baıqalady. Memleket bıýdjeti­nen qarjy­lan­dyrylatyn mektepte ha­lyqtyń bar­lyq toby bos ýaqytyn tıimdi ótkize almaq.

Atap ótken abzal, ult densaý­lyǵynyń sapasyn arttyrý men sport salasynyń órkendeýine úles qosý – «Samuryq-Qazyna» qory­nyń áleýmettik saıasaty men qaıy­­rymdylyq qyzmetiniń bas­­ty baǵyttarynyń biri. Oǵan dálel, buqaralyq sport ınfraqurylymyn damytýda, Qor demeýshiligimen, bıyl qazan aıynda Qyzylorda oblysynda Syr­darııanyń sol jaǵalaýynda ústel tennısiniń ortalyǵy salyndy. Shyǵys Qazaqstan oblysynda­ǵy Qatonqaraǵaı, Zaısan aýdandarynda tusaýy kesilgen sport alańdary «Samuryq-Qazyna» qorynyń qoldaýymen sońǵy úsh jylda elimiz boıynsha boı kótergen tıisti nysandardyń sanyn 30-ǵa jýyqtatyp otyr. Qor buqaralyq sportty damytý, balalarǵa sport ınfraqurylymyn qoljetimdi etý baǵytynda aýyldarda sport alańdarynan bólek, el boıynsha 10 dene shynyqtyrý-saýyqtyrý kesheni men kópsalaly sport keshenin iske qosty.

Qor tarapynan erekshe balalardy ońaltý men bilim alýy úshin jaǵdaı jasaýdan bólek, olardy beıimdelgen sport túrlerine baýlý máselesi qolǵa alynǵan. Qazirgi tańda 23 qala men eldi mekende túrli sport túrleri boıynsha 1100 erekshe balaǵa arnalǵan 89 seksııa tegin jumys istep tur. Qatysýshylardyń bir­qatary respýblıkalyq qana emes, halyq­­aralyq saıystardyń júldegeri atanýda.

Túrkistan oblysynda «Samruk-Kazyna Trust» qorynyń qar­jy­landyrýymen densaýlyq saqtaý, buqaralyq sport pen ınklıý­zııa­ny damytý, bilim berý, áleýmettik kásipkerlik jáne ha­lyqtyń áleý­mettik osal toptaryn qor­ǵaý ba­ǵyttarynda 2020-2024 jyldar aralyǵynda 1,5 mlrd teńgege 18 joba maquldandy. Onyń ishinde ońal­tý ortalyqtary, «Mektepke jol» aksııa­sy aıasynda áleýmettik osal toptaǵy oqý­shylarǵa mektep quraldaryn alyp berý, mek­tepishilik sanıtarlyq toraptar ornatý jáne aýyldyq medısına nysandaryna jańa jedel jár­dem kólikterin tabystaý sııaq­ty qadamdar bar. Mysaly, Qor qol­daýymen Kentaý qalasynda alǵash ret beıimdelgen sport boıynsha bochcha seksııa­sy ashyldy. Ná­tıjesinde, elimizdegi Qor lıft ornatyp berip, kópten beri sheshimin tappaı kele jatqan túıtkildi tarqatqan jalǵyz arnaýly kásiptik kolledjdegi tirek-qımyl júıesi buzylǵan I, II jáne III toptaǵy erek­she balalar ózderine yń­ǵaıly para­olımpıadalyq sport túrimen aına­lysa alady.