Shekara shebinde qyzmet etý – joǵary jaýapkershilik. Ásirese geosaıası ahýal kún saıyn qıyndap, qylmyskerlerdiń kóshi jıilep turǵan tusta qylt etken qımyl-qozǵalys kúdik pen sekem týǵyzady. Mundaı sátte elge tónetin qaýippen eń alǵash bolyp betpe-bet keletin shekarashylardyń syn saǵatta aqyl-oıy men fızıkalyq daıyndyǵy syr bermegeni abzal.
Ata-babadan qalǵan jerdi kirpik ilmeı kúzetý – úlken abyroı. Shekara qyzmetiniń aptap ystyq pen ańyraǵan jeldiń ótinde júretin jaýyngerleri árbir butanyń qalqasy, taýdyń ańǵary, ózen saǵasy, joldyń bultarysy men saıdyń qaltarysyndaǵy tynyshtyqqa jaýapty. Sondyqtan arnaýly qyzmet sarbazdarynyń shymyr bolýyna erekshe kóńil bólinedi. Bul oraıda UQK Shekara qyzmeti «Boran» arnaýly maqsattaǵy bólimsheniń sport jattyqtyrýshysy Saıan Nuryshevtiń eńbegi erekshe.
Bala kúninen sportqa jaqyn ósken Saıan úshin sarbazdardy sportqa baýlý – tabıǵatyna jaqyn ári súıikti jumysy. О́ziniń aıtýynsha, bul salaǵa osydan 25 jyl buryn Otan aldyndaǵy mindetin atqarýǵa kelip, sodan beri áskerı ómirmen taǵdyryn baılanystyrýǵa sheshim qabyldaıdy.
«Áskerge deıin ártúrli sportpen shuǵyldandym. Sonyń ishinde voleıbol, fýtbol, kúres, boks sekildi sport túrlerimen udaıy jattyǵyp júrdim. Áskerge daıyn sportshy retinde keldim desem bolatyn shyǵar. Basynda Almatydaǵy áskerı bólimshede jarty jyl jattyǵýda júrip, keıin Úsharaldaǵy shekara bólimshesine aýystyryldym. Sol jerde dene daıyndyǵynyń bastyǵy qabiletimdi baıqap, ártúrli jarystarǵa qatystyra bastady. Basynda qoıan-qoltyq urysqa qatysyp, úshinshi oryn alyp keldim. Keıin de jeńil atletıka, ártúrli fýtbol, voleıbol, ústel tennısinen jarystarǵa qatysyp júrdim. Jeńis te, jeńilis te boldy. Eki jyldan soń mindetti áskerı qyzmetim aıaqtalatyn kezde áskerı basshylyqtan osy salada qalýǵa usynys tústi. Júrek qalaýym osy jerge buryp turǵanyn túsinip, kelisim berdim. Bul sheshimim eshqashan ókindirgen emes. Bizde jylyna toǵyz túrli sporttan udaıy jarys bolady. Buryn jarysqa ózim qatyssam, qazir jattyqtyrýshymyn», deıdi ol.
Sodan beri S.Nuryshev el ishindegi emes, shekarashylar arasynda ótetin halyqaralyq jarystarda da baq synap, júldeli orynmen kelgen kúnderi kóp. Osy jyldarda Reseı, Ýkraına, Belarýs, Qytaı, О́zbekstan memleketterindegi sporttyq jarystarda kók týymyzdy jelbiretip, qazaq áskeriniń aıbynyn asqaqtatýǵa úles qosyp keledi.
«Jeńis ońaı kelmeıdi. Oljaly bolý úshin kóp eńbek etip, ter tógý kerek. Birde Qostanaıda UQK arasynda spartakıada ótip, fınalda qolymnan jaraqat alyp, ekinshi orynǵa taban tiredim. Araǵa bir aı salyp ekinshi jarys boldy. Qolym tolyq jazylmaı jatyp jarys alańyna shyqtym. Bastapqyda aýyryp turǵan qolymmen jeńiske jetý qıyn sekildi kórindi. Biraq esemdi qaıtardym. Taǵy bir joly sarbaz bolyp júrgende qarý atýdan jarys ótti. Nysanaǵa kózdep atýdan birneshe ret múlt kettim. Jattyqtyrýshymnyń maǵan degen senimin aqtaı almaǵanyma qatty uıaldym. Sol kúni túnimen kóz ilmeı shyqqan shyǵarmyn. Tańǵy besten turyp kelesi kedergiden ótý jarysyna daıyndaldym. Saǵat toǵyzda start bolý kerek. Tańerteń jattyqtyrýshy meni ornymnan tappaı qalady. Sondaǵy birinshi oıyna kelgeni «óz erkimen bólimsheni tastap qashyp ketti» bolǵan ǵoı. Al syrtqa shyqsa men jarysqa saqadaı saı turǵanymdy kórip qatqan qazyqtaı sileıip turyp qaldy. Sol jarysta sporttyń úsh túrinen jeńimpaz atanǵanym esimde», deıdi ol.
О́mir bolǵan soń jeńis pen jeńilis qatar júrýi – zańdylyq. Sportta da bap pen baqtyń únemi úılesim taba bermeıtini taǵy bar. Biraq Saıandy jeńilis jigerlendirip, ádiletsiz sheshim sheshýshi sátte kúsh beretindeı. Sebebi onyń qabilet-qarymyna kúdik artyp, jarys jolynan sebepsiz shyǵaryp salǵan sátterde sportqa degen adaldyǵy únemi alǵa súıreıtinin aıtady. Máselen, fýtboldan qurama músheligine ótkizbeı, jigerin jasytqysy kelgender de sportshynyń saǵyn syndyra almaǵan sekildi. Bir joly kúshtik qurylym arasynda fýtboldan jarys ótip, Saıan qosalqy quramǵa alynady. Komandalastary qarsylastarynan upaımen jeńilis taýyp jatady. Jattyqtyrýshy sharshaǵan sportshynyń ornyna alańǵa ony jiberedi.
«Babym kelisti me, baǵym jandy ma bilmeımin, komandalastarymnyń esebine eki gol salyp, jeńis týynyń jelbireýine sebepshi bolǵanym bar. «Dınamonyń» fýtbol komandalary arasynda ótken jarysta 16 gol salyp, «Úzdik oıynshy» da atandym. Al qazir arnaýly maqsattaǵy basqarmada shákirt tárbıelep, ártúrli jarystarǵa qatystyryp júrmiz. Shekarashy úshin sport tek oıyn emes, kúndelikti jattyǵýǵa aınalý kerek. О́ıtkeni qaýiptiń aldyn alý úshin dene daıyndyǵy myǵym bolǵany durys. Ásirese kúshtik qurylymnyń ishindegi arnaýly maqsattaǵy bólimshege artylar júk eki ese», deıdi Saıan Serikuly.
Senim men jiger, eńbek pen qulshynys arqyly sportshy jetken jetistik jeterlik. Sonyń ishinde О́zbekstannyń 5 dúrkin chempıony, eki dúrkin Olımpıada oıyndarynyń chempıony, qoıan-qoltyq urystan TMD-nyń birneshe dúrkin jeńimpazy, Odessadaǵy halyqaralyq týrnırdiń júldegeri sekildi marapattaryn erekshe aıtyp ótken abzal. Bul ǵana emes, Saıan – «Ásker» fýtbol klýbynyń negizin qalaýshysy.
Qoıan-qoltyq urys, áskerı trıatlon, oq atýdyń úsh túrinen sport sheberi atanǵan ol – Otanyna berik, antyna adal, otbasynda tórt bala tárbıelep otyrǵan úlgili áke. О́mirlik jary da Shekara qyzmetinde el tynyshtyǵy kúzetinde qaltqysyz qyzmet etip keledi. «Áke kórgen oq jonar» degendeı, tuńǵyshy Álibek te sportqa áýes. Anasy men ákesinen kórgeni kóp bala kishkentaı kúninen tańmen talasa áskerı dabyl soǵylǵanda sarbaz bolyp, túrli jarysqa da ilese barady eken. Bıyl ata-anasynyń jolyn jalǵaýdy maqsat tutqan uly da 8-synyptan soń «Arystan» mektebine oqýǵa túsken. Ulynyń tańdaýyn ákesi de árqashan qoldaıtynyn aıtady. О́ıtkeni Otandy qorǵaý – er jigit úshin qasıetti paryz, qasterli borysh.