Jaqynda Astanadaǵy «Arızona» bılıard klýbynda memleket jáne qoǵam qaıratkeri Berdibek Saparbaevty eske alýǵa arnalǵan bılıard oıynynan týrnır uıymdastyryldy.
Tanymal tulǵany kórip-bilgen jáne jaqyn aralasqan azamattardyń tikeleı qoldaýymen bastalǵan osyndaı bılıard saıysy bıyl ekinshi ret ótkizilip otyrǵanyn atap aıtý kerek. Bılıard saıysy bastalmas buryn ótken jyly ómirden ozǵan Berdibek Saparbaevtyń arýaǵyna arnalyp quran oqyldy, oǵan qaıratkerdiń urpaǵy Jansultan Berdibekuly qatysty.
Bıylǵy bılıard saıysyna Almaty, Qyzylorda men Túrkistannan da arnaıy qonaqtar kelip qatysyp, óz sheberlikterin kórsete aldy. Uıymdastyrý komıtetiniń atynan sóz alǵan jazýshy-dramatýrg Joltaı Jumat óz sózinde «halqymyzdyń qaıratker uldarynyń esimin esten shyǵarmaı, eske alyp otyrý baǵytyndaǵy bul ıgi bastamanyń keıingi jas urpaqqa berer tálimi mol, sondyqtan da is-sharanyń aıasyn budan da keńeıte túsip, sport saıysyn jylma-jyl jalǵastyryp otyrǵan óte oryndy bolmaq» dep atap ótti. Qaıratker azamattyń kózin kórgen eńbek ardagerleri Aǵabek Ábdiorazov, Baıanbaı Ysraıylov, Tursynhan Aqylbekov, taǵy basqalar óz estelikterimen bólisti.
Saıys qorytyndysynda jaqsy oıyn úlgisin kórsetken Nurjan Esenuly birinshi, Qanat Tursynbaıuly ekinshi, al Baqytjan Pármenov úshinshi oryndardy ıelenip, jeńimpazdarǵa aqshalaı syılyqtar berilip, jazýshy Joltaı Jumat-Álmashulynyń ótken jyly jaryq kórgen «Qarataý qahary» atty romandar kitaby tabystaldy.
Jasulan Jandarbek
Astana