Qazaqstan Premer-mınıstri Oljas Bektenov pen Belarýs Premer-mınıstri Roman Golovchenko Mınsk qalasynda kelissózder júrgizdi.
Saýda-ekonomıkalyq jáne mádenı-gýmanıtarlyq yntymaqtastyqty damytýda eki memleket basshylary deńgeıinde qol jetkizilgen ýaǵdalastyqtardy júzege asyrý barysy talqylandy. Bıdaıdy tereń óńdeý, qurylys ındýstrııasy, kólik, IT salasy, týrızm jobalaryna ekpin bere otyryp, ónerkásip kooperasııasy men aýyl sharýashylyǵyna basa nazar aýdaryldy.
Qazaqstan men Belarýs arasyndaǵy ózara saýda kólemi bıyl 8 aıda 600 mln dollardy qurady. Qazaqstannyń (eksporttaǵy úlesi 10,2%) un jáne basqa da ónimderi Belarýs naryǵynda suranysqa ıe. Sondaı-aq bıyl 9 aıda avtomobıl tasymaly kólemi 19%-ǵa artyp, 450,6 myń tonnaǵa jetti, salada oń dınamıka baıqalady.
Qazaqstan men Belarýs úkimetteri ónerkásip kooperasııasyn damytý boıynsha birlesip jumys isteýde. Jalpy pýlǵa 1,8 myń jumys ornyn ashýǵa múmkindik beretin, quny 277,5 mln dollardy quraıtyn 14 joba kiredi. Onyń ishinde Qazaqstan óńirlerinde 200 mln dollardan astam somaǵa 11 birlesken kásiporyn iske qosylyp, 1,6 myń jumys orny ashyldy. Zaýyttarda traktorlardy, astyq jáne jemshóp jınaıtyn kombaındardy, tirkelmeli aýylsharýashylyq tehnıkalaryn qurastyrady. Taǵy 3 joba iske asyrý satysynda tur.
Temirjol ónimderin shyǵaratyn jáne Belarýs eline relsterge bekitilgen shpaldar, fıtıngtik platformalar, temirjol dóńgelekteri, toraptar jáne agregattar jetkizýdi uıymdastyrý múmkindigi bar otandyq kompanııalardyń eksporttyq áleýetine erekshe nazar aýdaryldy.
Kelissózder nátıjesinde ekijaqty birqatar qujatqa, atap aıtqanda, Qazaqstan men Belarýs úkimetteri arasyndaǵy birlesken jobalar pýlyn tolyqtyrýǵa jáne isker toptar arasynda tyǵyz baılanys ornatýǵa baǵyttalǵan 2025-2029 jyldarǵa arnalǵan saýda-ekonomıkalyq yntymaqtastyqty damytý jónindegi jol kartasy; «Kazakh Tourism» UK» AQ men Belarýs Respýblıkanyń Ulttyq týrızm agenttigi arasyndaǵy ekologııalyq, medısınalyq, taý shańǵysy, aýyl týrızmi jáne balalar men jasóspirimder týrızmi salasynda tájirıbe almasýdy kózdeıtin yntymaqtastyq týraly kelisim; Mádenı-gýmanıtarlyq yntymaqtastyq salasyndaǵy ózara is-qımyl jónindegi 2025-2026 jyldarǵa arnalǵan is-sharalar josparyna qol qoıyldy.
Sondaı-aq Mınskide Joǵary tehnologııalar parkine barǵan sátte Oljas Bektenovke «bultty» tehnologııalarda, kıberqaýipsizdik, qarjy sektory jáne basqa da salalarda júzege asyrylatyn sıfrly jobalar usynyldy.