Premer-mınıstrdiń orynbasary Tamara Dúısenova Azııa damý bankiniń atqarýshy dırektory Sharlotta Jıýstın Dıokno-Sıkatpen kezdesti.
Bıyl halyqaralyq qarjy ınstıtýtymen yntymaqtastyqtyń 30 jyldyǵy atalyp ótilýde. Vıse-premer osy kezeńde ártúrli salalardaǵy jobalardy qarjylyq, tehnıkalyq jáne konsýltasııalyq qoldaý boıynsha jumystar júrgizilgenine nazar aýdardy.
Qazir bank Qaraǵandyda kópsalaly ýnıversıtettik aýrýhanany salý jáne paıdalaný boıynsha konsýltasııalyq qyzmetter kórsetedi. Sondaı-aq MJÁ qaǵıdalarynyń jobasyn jetildirý boıynsha tehnıkalyq kómek kórsetiledi. Qanatqaqty joba retinde Almatyda Q.Sátbaev atyndaǵy Qazaq ulttyq tehnıkalyq zertteý ýnıversıteti úshin 5 stýdenttik jataqhana salý kózdelgen.
Memleket basshysynyń tapsyrmasy boıynsha elimizde bilim berý sapasyn arttyrý boıynsha keshendi sharalar iske asyrylyp jatyr. Onda ınfraqurylymdy, oqý baǵdarlamalaryn jetildirý, pedagogterdiń biliktiligin arttyrý kózdelgen. Prezıdent qoıǵan mindetterdiń biri – 1 300 mektepti kúrdeli jóndeýden ótkizý. Ǵımarattardy jóndeýden basqa, olardy zamanaýı oqý kabınetterimen jaraqtandyrý kózdeledi. T.Dúısenova Azııa damý bankiniń ókilderin osy baǵytta birlesip jumys isteýge shaqyrdy. Kezdesý barysynda qarjy ınstıtýtynyń qatysýy múmkindigi boıynsha pikir almasyldy.
Azııa damý bankiniń ókilderi áleýmettik saladaǵy yntymaqtastyqty keńeıtýge daıyn ekendikterin bildirdi. Taraptar usynylǵan jobalardy tıisti salalyq mınıstrliktermen tyǵyz qarym-qatynasta qarastyrýǵa ýaǵdalasty.