• RUB:
    6.68
  • USD:
    520.93
  • EUR:
    609.07
Basty saıtqa ótý
Prezıdent 28 Qarasha, 2024

Memleket basshysy qaýipsizdiktiń ózekti máseleleri jóninde pikir bildirdi

100 ret
kórsetildi

Qasym-Jomart Toqaev shaǵyn quramda ótken otyrysta memleketter basshylary halyqaralyq jáne óńirlik qaýipsizdiktiń ózekti máseleleri jóninde pikir almasqanyn aıtty. Sondaı-aq Qazaqstannyń tóraǵalyǵy aıasynda UQShU-nyń bıylǵy qyzmeti qorytyndylanǵanyn jetkizdi, dep habarlaıdy Egemen.kz.

«Kezdesý qorytyndysy ujymdyq qaýipsizdikke tónetin qaýip-qaterge qarsy jumyla áreket etýge daıyn ekenimizdi taǵy da rastady. Pikirtalas barysynda halyqaralyq kún tártibindegi máseleler boıynsha ustanymdarymyzdy jetkizdik. Bizdiń qazirgi jaǵdaıǵa ortaq baǵamyz jáne UQShU-nyń odan ári damýyna kózqarasymyz Qazaqstannyń bastamasymen ázirlengen Ujymdyq qaýipsizdik keńesiniń deklarasııasynda kórinis tapty. Uly Jeńistiń 80 jyldyǵyn merekeleýge erekshe mán berildi. Ardagerlerdiń maıdandaǵy jáne tyldaǵy erligi esimizde máńgi saqtalady. Olardy árdaıym maqtan tutamyz, qurmetteımiz. Aıtýly mereke qarsańynda UQShU Ujymdyq qaýipsizdik keńesiniń málimdemesin qabyldaý, sondaı-aq Uly Jeńistiń 80 jyldyǵyna oraı merekelik is-sharalar josparyn bekitý mańyzdy dep sanaımyz», dedi Memleket basshysy.

Qasym-Jomart Toqaevtyń aıtýynsha, Qazaqstannyń UQShU-ǵa tóraǵalyǵy aıasynda Uıym jarǵysyna saı yntymaqtastyq baǵyttary boıynsha 60-qa jýyq is-shara uıymdastyrylǵan. Halyqaralyq arenada kelisilgen ustanymdardy ilgeriletý boıynsha seriktestermen birlese jumys júrgizildi.

«Bıyl qabyldanǵan saıası qujattar legine UQShU-ǵa múshe memleketterdiń jalpy baǵalaýy negiz boldy. Olardyń ishinde halyqaralyq aqparattyq qaýipsizdik, ǵarysh salasyndaǵy yntymaqtastyq máseleleri men Taıaý Shyǵystaǵy ahýalǵa baılanysty, sondaı-aq Belorýssııany basqynshylardan azat etýdiń 80 jyldyǵyna oraı qabyldanǵan málimdemeler bar. Jyl boıy ujymdyq qaýipsizdik júıesiniń kúshteri men quraldarynyń áskerı daıyndyǵyna muqııat nazar aýdaryldy. Búgin biz UQShU kúshteri men quraldary mártebesine jáne áskerı kontıngentti tasymaldaýǵa qatysty halyqaralyq kelisimderdiń eki hattamasyna qol qoıamyz. UQShU-ǵa múshe elderdiń bitimgerlik kúshteriniń daıyndyq deńgeıi men jaýyngerlik mashyǵyn jetildirý jumystary júrgizilip jatyr. Qyrkúıek-qazan aılarynda elimizde «Myzǵymas baýyrlastyq-2024» UQShU Bitimgershilik kúshteriniń komandalyq-shtabtyq oqý-jattyǵýlary men «Jartas-2024» UQShU arnaıy oqý jıyny ótti. Asa qaýipti nysandardaǵy kúrdeli apattyq-qutqarý jumystaryn júrgizýdiń birlesken is-qımyly pysyqtaldy», dedi Qazaqstan Prezıdenti.