Semeıde jańadan ashylǵan, angıograf apparaty ornatylǵan rentgenendovaskýlıarlyq operasııa bólmesi – medısına múmkindikterin keńinen paıdalanatyn oryndardyń biri. Bul apparatty qoldaný arqyly kardıologııalyq, arıtmologııalyq, angıohırýrgııalyq, kardıohırýrgııalyq, júıke júıesi, jalpy qan aınalymy júıesi aýrýlaryn emdeýge, gıbrıdti tehnologııalardy damytýǵa jaǵdaı jasalǵan.
Munda rentgenendovaskýlıarlyq operasııalardy oryndaý ınfarkt, ınsýlt, basqa da qaýipti aýrýlardy emdeýde medısınalyq kómek kórsetý sapasyn jaqsartýǵa jol ashady. Angıograf – búkil deneniń, sonyń ishinde júrek tamyrlary, mı, moıyn, keýde jáne ish qýysy, aıaq-qoldaǵy tamyr patologııasyn anyqtaıtyn zamanaýı qural-jabdyq.
Kúrdeli operasııalar júrgiziletin biregeı bólmede rentgenhırýrgııalyq operasııalar eń aldymen az ınvazıvti ádis arqyly júzege asady. Buǵan qosa barlyq manıpýlıasııa tómen travmatıkalyq tásilder (shaǵyn kesý nemese tamyr pýnksııalary) arqyly atqarylady. Munda arnaıy em-dom qabyldaǵan, ıaǵnı kúrdeli operasııa jasalǵan naýqas tez arada qalpyna kelip, qysqa merzim ishinde saýyqtyrylatyny ǵylymı turǵyda dáleldengen.
Rentgenhırýrgııa bóliminiń meńgerýshisi Baýyrjan Azızov Semeı medısına ýnıversıtetiniń gospıtalinde ashylǵan jańa ortalyqtyń keleshekte keń kólemde qyzmet kórsetetinin aıtady.
«Bul bólim ýnıversıtet rektory, professor Altaı Ahmetqalıulynyń arnaıy bastamasy negizinde ashylyp otyr. Semeı óńirińde joǵary tehnologııalyq rentgenhırýrgııalyq kómektiń keńspektrli operasııalary 2013 jyldan beri tájirıbeli mamandarmen birge atqarylyp keledi. Jylyna 4000-ǵa jýyq naýqasqa kómek kórsetýge, onyń ishinde 2500 dıagnostıkalyq, 1500 emdik maqsattaǵy operasııa jasaýǵa bolady. Bólimimiz jańa qondyrǵymen tolyqqan soń, naýqastarǵa kómek kórsetý arta túsedi. Jabdyqta sáýlelený dozasyn shekteý mehanızmderi bar, bul naýqastyń denesine sáýlelenýdiń tómen áserin tıgizedi. Sondyqtan angıografııalyq zertteý is júzinde qaýipsiz. Zertteý aldynda naýqas pen personalǵa sáýlelenýdiń áserin azaıtý maqsatynda qosymsha sharalar qabyldanyp, dozalary esepteledi», deıdi Baýyrjan Slámuly.
Jańa angıograf bólmesi atalǵan ýnıversıtettiń gospıtalinde usynylatyn medısınalyq qyzmetterdiń aýqymyn keńeıtip, júrek, qan tamyry júıesi aýrýlaryna shaldyqqan naýqastarǵa kómek qolyn sozyp, olardyń aýrýdy jeńýine barynsha jaǵdaı jasaıdy. Sonymen qatar barlyq sanattaǵy perıferııalyq tamyrlardyń patologııasymen aýyratyn naýqastarǵa endovaskýlıarlyq aralasý men rekonstrýksııalyq-gıbrıdti operasııalar júrgizedi. Jańa zamanaýı tehnologııalardy engizý medısına ýnıversıtetiniń stýdentteri men rezıdentterine bilimin baıytyp, biliktiligin kóterýge yqpal etedi.
О́ńirdegi medısına salasyn qalypty damytý, naýqastarǵa qyzmet kórsetý sapasyn arttyrý jumystary aldaǵy ýaqytta da jalǵasyn tabady. Zaman talabyna saı jabdyqtalǵan medısınalyq tehnologııalardy paıdalaný arqyly dárigerlerdiń jumysy birshama jeńildetiledi. Derekterge súıensek, keıingi 10 jyl ishinde atalǵan ortalyq dárigerleri 16 myńnan astam adamǵa angıografııalyq operasııa jasaǵan. Aq halatty abzal jandardyń aralasýymen shamamen 6 myń adamnyń júregine stent qoıylyp, ómirin uzartý múmkindigi oıdaǵydaı júzege asqan.
Búginde elimizdiń túkpir-túkpirinde ǵana emes, álemniń ár tarabynda medısına salasynda sapaly qyzmet atqaryp júrgen talaı-talaı bilikti mamandardy daıarlaǵan Semeı medısına ýnıversıtetinde 6 myńnan astam stýdent bilim alady. Sonyń ishinde myńnan astamy – 11 memleketten kelgen sheteldik izdenýshiler.
SEMEI